Yunan nəşri: Biz hamımız türkük!
Bakı, 8 fevral, AZƏRTAC
Yunanıstanın “Kathimerini” adlı populyar gündəlik qəzeti öz saytında və sosial şəbəkələrdəki hesablarında Türkiyə xalqını dəstəkləyən rəsm dərc edib. Rəsmin müəllifi Dimitris Hadzapulos binanın fasadında “Biz hamımız türkük” yazan gənci təsvir edib.
AZƏRTAC xəbər verir ki, bu rəsm dünən tanınmış fransız satirik jurnalı “Charlie Hebdo”nun qalmaqallı karikaturasına özünəməxsus cavab olub.
Yunan nəşrinin bu addımı sosial şəbəkə istifadəçilərinin ziddiyyətli reaksiyasına səbəb olub. Bəziləri qeyd ediblər ki, təkcə türklər deyil, suriyalılar və kürdlər də dəstəyə layiqdirlər, digərlərinin fikrincə, bu cür vəziyyətlərdə insanları milli mənsubiyyətinə görə qiymətləndirmək düzgün deyil. Lakin əksər şərhlərdə sözügedən qəzetin bu cür mövqeyi etiraz doğurub və onları yazanlar hər kəsin adından çıxış etməməyi tövsiyə ediblər.
Xatırladaq ki, bu ərəfədə türklərə və ümumilikdə müsəlmanlara qarşı düşmənçiliyi ilə fərqlənən “Charlie Hebdo” fransız jurnalının tviter hesabında Türkiyədə dağılmış binaları və aşmış avtomobilləri təsvir edən karikatura dərc edilib. Bu nəşr təxribatçı karikaturanı aşağıdakı istehzalı sözlərlə təqdim edib: “Hətta tanklar da lazım deyil”.
Bölmənin digər xəbərləri
