Yunanıstanda Homerin adı ilə bağlı qədim arxeoloji abidə ictimaiyyətə təqdim olunacaq
Afina, 21 oktyabr, AZƏRTAC
Yunanıstanın İtaka adasında yerləşən və yunan şairi Homerin adı ilə əlaqələndirilən “Homer məktəbi” (Aqios Atanasios) arxeoloji kompleksinin ziyarətçilər üçün açılmasına hazırlıq görülür.
AZƏRTAC xəbər verir ki, Yunanıstanın “Kathimerini” qəzetinin məlumatına görə, ölkənin Mərkəzi Arxeologiya Şurası ərazinin ictimaiyyət üçün əlçatan olmasını nəzərdə tutan layihəni yekdilliklə təsdiqləyib.
Tədqiqatlar zamanı Eksoqi dağının yamacında yerləşən kompleksdə məskunlaşmanın eramızdan əvvəl 1900–1100-cü illəri (Orta Ellada və Miken dövləri) əhatə etdiyi, həmçinin Ellinizm və Roma dövründə də istifadə olunduğu müəyyən edilib.
Layihə çərçivəsində ərazidə xüsusi arxeoloji park salınacaq, məlumat lövhələri quraşdırılacaq, avtomobil dayanacağı yenilənəcək və əlilliyi olan şəxslər üçün uyğunlaşdırılmış piyada cığırları salınacaq. Abidənin tam tədqiqi üçün əlavə qazıntıların aparılması da nəzərdə tutulur.
Qeyd edək ki, İtaka adası Homerin “Odisseya” poemasının baş qəhrəmanı Odisseyin vətəni sayılsa da, bu kompleksin şairin özü ilə birbaşa əlaqəsi elmi baxımdan hələ sübuta yetirilməyib.
Bölmənin digər xəbərləri
