Yunanıstanın “Diplomatik baxış” jurnalında Azərbaycanın bu ölkə ilə münasibətlərinə dair məqalə dərc olunub
Afina, 13 iyul, AZƏRTAC
Yunanıstanın geniş oxucu kütləsinə malik “Diplomatik baxış” jurnalında Azərbaycanın Yunanıstan və Albaniyandakı səfiri Anar Hüseynovun “Azərbaycan xarici siyasətində açıqdır və beynəlxalq hüquqa riayət edir” sərlövhəli müsahibəsi dərc olunub.
Siyasi və mədəni yönümlü jurnalda dərc edilən müsahibədə gələn il Azərbaycan ilə Yunanıstan arasında diplomatik münasibətlərin qurulmasının 30 illiyinin tamam olacağı vurğulanıb. Nisbətən qısa müddət ərzində iki ölkə arasında əməkdaşlıq üçün möhkəm hüquqi təməl yaradıldığı, müxtəlif səviyyələrdə çoxsaylı səfərlər mübadiləsinin gercəkləşdirildiyi, bir çox iqtisadi, mədəni və humanitar proqramların həyata keçirdiyi qeyd olunub. Bundan əlavə, TAP layihəsinin ölkələrimizi təbii şəkildə bir-birinə bağladığı və enerji sahəsinin iki ölkə əlaqələrinin strateji səviyyəyə yüksəldiyi vurğulanıb.
Yazıda geosiyasi stereotiplərə baxmayaraq, münasibətlərimizin beynəlxalq hüququn prinsiplərinə hörmətlə davamlı şəkildə inkişaf etdiyi, hər iki ölkənin beynəlxalq hüququn əsas prinsiplərinə - ərazi bütövlüyü və sərhədlərin toxunulmazlığına hörmətlə yanaşdığı nəzərə çatdırılıb.
Müsahibədə Azərbaycanın enerji diplomatiyasından söhbət açılaraq, bunun ölkəmizin xarici siyasətində önəmli yer tutmaqda davam etdiyi vurğulanıb və TAP layihəsinin Yunanıstan ilə Azərbaycanı daha da yaxınlaşdırdığı bildirilib. Belə ki, bu ölkənin Azərbaycanın Avropa İttifaqının enerji bazarına giriş qapısı rolunu oynadığı diqqətə çatdırılıb. Həmçinin İkinci Qarabağ müharibəsindən sonra cari vəziyyət və beynəlxalq ictimaiyyətin hadisələrə mövqeyi barədə məlumat verilib, Bakı üçün bu münaqişənin başa çatdığı, bölgədə sülhün və sabitliyin təşviqi üçün Ermənistanla barış və tam əməkdaşlığın dəstəkləndiyi qeyd olunub.
Yazıda Azərbaycan ilə Türkiyə arasında ikitərəfli əlaqələrin tarixən dost münasibətləri olduğu və strateji səviyyəsi qeyd edilib. Türkiyənin Azərbaycan üçün etibarlı qonşu olmaqla yanaşı, coğrafi mövqeyi, siyasi və iqtisadi gücü baxımından bölgədə əhəmiyyətli oyunçu olduğu bildirilib. Türkiyənin Azərbaycanın müstəqilliyini bərpa etdiyi gündən bəri beynəlxalq hüquqa əsaslanan mövqeyini açıq şəkildə dəstəkləyən ölkə olduğu, buna görə də onun beynəlxalq hüquq normaları çərçivəsində mövqelərinin ölkəmiz tərəfindən dəstəkləndiyi vurğulanıb.
İqbal Hacıyev
AZƏRTAC-ın xüsusi müxbiri
Afina
Bölmənin digər xəbərləri
