SİYASƏT
Yuri Kim diqqəti real problemlərdən yayındırmağa çalışır - Ekspert
![Yuri Kim diqqəti real problemlərdən yayındırmağa çalışır - Ekspert](/files/2023/3/1200x630/16948544061066148511_1200x630.jpeg)
Bakı, 16 sentyabr, AZƏRTAC
ABŞ Dövlət katibinin Avropa və Avrasiya məsələləri üzrə köməkçisi vəzifələrini icra edən Yuri Kim müşahidəsində olan regionda sülhün və sabitliyin bərqərar edilməsini həqiqətən istəyirsə, bu ərazilərdə problemləri yaradan səbəblərin aradan qaldırılmasına çalışmalıdır. O, Azərbaycanla Ermənistan arasında mövcud olan problemin real səbəblərini bilir, həmçinin bu problemin rəsmi İrəvanın işğalçılıq siyasətindən, Qarabağda separatçı hərəkatı dəstəkləməsindən qaynaqlandığını görür. Bu baxımdan əgər Azərbaycanla Ermənistan arasında mehriban qonşuluğun yaradılması prosesinə töhfə vermək istəyirsə, o, ilk növbədə, Ermənistanın işğalçılıq siyasətini pisləməlidir. Amma Yuri Kim əksinə hərəkət edir. Öz açıqlamalarında Ermənistanın işğalçılıq siyasətini, Qarabağda məskunlaşmış separatçı qrupları deyil, Azərbaycanı hədəf seçir.
Bu sözləri AZƏRTAC-a açıqlamasında Mətbuat Şurasının İdarə Heyətinin üzvü, media eksperti Müşfiq Ələsgərli söyləyib.
Yuri Kimin sentyabrın 14-də ABŞ Senatının Xarici Əlaqələr Komitəsində keçirilən dinləmələrdə iştirak edərək, “Qarabağda humanitar böhran yaşanması” barədə yalançı kampaniyaya dəstək verdiyini xatırladan ekspert bildirib: “Halbuki məhz həmin məqamda Ermənistan özünün destruktiv hərəkətlərini davam etdirirdi. Sentyabrın 2-də qondarma “Artsax respublikası”nın “müstəqilliyi”nin 32 illiyi Ermənistanda qeyd edildi. Ermənistanın baş naziri Nikol Paşinyan da bu münasibətlə xalqına təbrik məktubu göndərdi. O, bununla da Qarabağda separatçı hərəkatın yenidən alovlanması üçün addımlar atdı. Sentyabrın 9-da isə Qarabağ bölgəsində məskunlaşmış separatçı dəstələr qondarma “prezident seçkiləri” keçirməklə problemi yenidən aktuallaşdırmağa təşəbbüs göstərdilər. Bütün bu olanları pisləyən bəyanatlar vermək Yuri Kimin birbaşa vəzifəsidir.
Azərbaycanın xarici işlər naziri Ceyhun Bayramov sentyabrın 9-da Yuri Kimlə şəxsən danışaraq, Ermənistan tərəfinin alovlandırdığı separatçı proseslər barədə onu şəxsən məlumatlandırıb. Qarabağ bölgəsində qondarma rejimin sentyabrın 9-da “prezident seçkiləri” adı altında apardığı qanunsuz fəaliyyətin Azərbaycan Konstitusiyasına, beynəlxalq hüququn norma və prinsiplərinə zidd olduğunu qeyd edib. Bu addımın bölgədə normallaşma prosesinə, erməni sakinlərin Azərbaycan Respublikasının Konstitusiyası çərçivəsində reinteqrasiya edilməsi səylərinə ciddi zərbə vurduğunu bildirib”.
M.Ələsgərli diqqətə çatdırıb ki, Ermənistan özünün silahlı qüvvələrini Azərbaycanın Qarabağ bölgəsindən tamamilə çıxarmaq barədə götürdüyü öhdəliyə əməl etməyib. Beləliklə, ABŞ tərəfinin də vasitəçiliyi ilə iki ölkə arasında əldə edilən razılaşmaları pozub. Amma təəssüf ki, baş verənlərin heç biri Yuri Kimin gündəliyində yer almayıb. Əksinə, o, bu proseslərin baş verdiyi bir dönəmdə qondarma “Artsaxda humanitar böhran” kampaniyasına dəstək olan açıqlamalar verib. Y.Kim bununla da beynəlxalq ictimaiyyətin diqqətini real problemlərdən yayındırmağa çalışıb.
“Sentyabrın 14-də ABŞ Senatının Xarici Əlaqələr Komitəsində keçirilən dinləmələrin təşəbbüskarlarından və təşkilatçılarından biri də ermənipərəst senator Robert Menendezdir. Ölkəmizlə bağlı ənənəvi düşmən mövqeyi sərgiləyən bu senatora qarşı hazırda onun öz ölkəsində korrupsiya ittihamları ilə istintaq prosesi aparılır. Həyatı çirkaba bulaşmış bu şəxsin oyunlarına qatılması Yuri Kimin də karyerasını şübhə altına salır. Arzuediləndir ki, ABŞ-ın özü bu müəmmaları araşdırıb uyğun qərarlar versin”,- deyə o qeyd edib.