ZAQATALADA ÇAY VƏ GÜL LƏÇƏYİ YIĞIMI DAVAM EDİR
Zaqatala, 6 iyun (AZƏRTAC). Zaqatala rayonunun çay və qızılgül plantasiyalarında məhsul yığımı davam edir.
Hazırda rayonda mövcud çay plantasiyalarının ümumi sahəsi 60 hektara yaxındır.
Rayonun ən iri çay istehsalçısı “Zaqatala-Çay” Məhdud Məsuliyyətli Cəmiyyətindən bildirmişlər ki, plantasiyalara qulluq və çay yığımı ilə əlaqədar 90 fermerlə icarə müqaviləsi bağlanmışdır. İndiyədək plantasiyalardan 13,3 ton yaşıl çay yarpağı yığılmış, ondan 3 tona yaxın quru çay emal olunmuşdur. Mövsümün sonunadək plantasiyalardan daha 10-11 ton yaşıl çay yarpağının toplanılacağı gözlənilir.
Rayonun qızılgül plantasiyalarında gül ləçəyi yığımı başa çatmaq üzrədir. İndiyədək mövcud 24 hektar plantasiyadan 16 tona yaxın qızılgül ləçəyi yığılmışdır. Tədarük edilmiş məhsul rayonun Qazangül qəsəbəsində fəaliyyət göstərən “Cəliar” firmasına məxsus gül yağı zavodunda emal edilir. Ümumiyyətlə, bu il zavodda 3 kiloqram gül yağının istehsal olunacağı proqnozlaşdırılır.
Bölmənin digər xəbərləri
