Zaqatalalı fermerlərin soya əkininə marağı artıb
Zaqatala, 19 may, Mustafa Dadaşov, AZƏRTAC
Bu il Zaqatala rayonunun fermer təsərrüfatlarında soya bitkisinin əkininə maraq daha da artıb. Belə ki, ötən təsərrüfat ilində rayonda soya əkini ilə 6 fermer məşğul olurdusa, bu il onların sayı 13 nəfərə çatıb. 2017-ci ildə zaqatalalı fermerlər ilk dəfə əkdikləri 99 hektar soya sahəsindən 105 ton məhsul tədarük ediblər. Cari ildə isə soya istehsalının 150 tona çatacağı proqnozlaşdırılır. İndiyədək təsərrüfatlarda 85 hektar sahədə soya əkilib və bu iş davam etdirilir.
Keçən il olduğu kimi, bu il də rayonda soya əkini sahələrinin böyük hissəsi Muxax kənd sakini Abdulla Mahmudovun rəhbərlik etdiyi “Muxax” İstehsal Kooperativinin payına düşür. Təsərrüfat rəhbəri AZƏRTAC-ın bölgə müxbirinə bildirib ki, bu il 50 hektar sahədə soya əkib. Bundan əlavə, taxıl biçinindən sonra təkrar əkin zamanı sınaq məqsədi ilə daha 20-25 hektar sahədə soya əkməyi planlaşdırır. Ötən il təsərrüfata məxsus soya sahələrindən 80 tondan çox məhsul tədarük olunub. Hava şəraiti imkan verərsə, cari mövsümdə soya istehsalının 100 tondan çox olacağı gözlənilir.
Təsərrüfat rəhbəri qeyd edib ki, soya yüksək rentabelli, qiymətli bitkidir və böyük iqtisadi əhəmiyyəti var. Xüsusilə heyvandarlığın və quşçuluğun inkişaf etdirilməsində, bu sahələrin yem təminatında, məhsuldarlığın artırılmasında soya bitkisi mühüm rol oynayır.
Bölmənin digər xəbərləri
