Bakı, 21 aprel, AZƏRTAC

Bu gün Azərbaycan dünyada güclü, nüfuzlu dövlət, etibarlı və perspektivli tərəfdaş kimi tanınır. Ümummilli lider Heydər Əliyevin əsasını qoyduğu uğurlu siyasətin Prezident İlham Əliyev tərəfindən milli maraqlara, müasir çağırışlara uyğun davam etdirilməsi ölkəmizə böyük nailiyyətlər qazandırıb. Xüsusilə də, çoxvektorlu xarici siyasət respublikamızın beynəlxalq mövqeyinin möhkəmlənməsini təmin edib. Diaspor quruculuğu və diaspor təşkilatlarının səmərəli fəaliyyəti üçün məqsədyönlü addımların atılması da bu baxımdan mühüm əhəmiyyətə malikdir.

Bu fikirləri AZƏRTAC-a açıqlamasında Milli Məclisin Regional məsələlər komitəsinin sədri Siyavuş Novruzov bildirib.

S.Novruzovun sözlərinə görə, dünya azərbaycanlılarının təşkilatlanması, diaspor quruculuğu ümummilli lider Heydər Əliyevin adı ilə bağlıdır. Dünya Azərbaycanlılarının Qurultaylarının keçirilməsi bu prosesə mühüm töhfə olub. Ulu Öndərimiz və Prezident İlham Əliyevin qurultaylarda qarşıya qoyduqları strateji əhəmiyyətli vəzifələr və dövlətin diaspor təşkilatlarına davamlı dəstəyi Azərbaycan həqiqətlərinin dünya ictimaiyyətinə çatdırılmasına geniş imkanlar yaradıb. Son illər atılan addımlar da bu mənada böyük önəm daşıyır. Diasporla İş üzrə Dövlət Komitəsinin fəaliyyətinin təkmilləşdirilməsi, 2018-ci ildə yeni “Strateji Yol Xəritəsi”nin işlənib hazırlanması və icrası, diaspor fəaliyyətində informasiya-kommunikasiya texnologiyalarının tətbiqi və inkişaf etdirilməsi xüsusi qeyd edilməlidir.

Komitə sədri vurğulayıb ki, xaricdə yaşayan soydaşlarımızın, təşkilatların fəaliyyətinin koordinasiyası milli həmrəyliyin güclənməsinə, strateji hədəflərin reallaşmasına təkan verib. Birinci vitse-prezident Mehriban xanım Əliyevanın təşəbbüsü ilə xaricdəki azyaşlı uşaqlar üçün “Qarabağ” Azərbaycan məktəblərinin təsis olunması, xarici ölkələrdə koordinasiya şuralarının yaradılması və digər addımlar mühüm nəticələrin və nailiyyətlərin əldə olunmasını şərtləndirib. Ən əsası, Vətən müharibəsi zamanı diaspor təşkilatlarının sistemli fəaliyyəti Azərbaycanın tarixi Qələbəsində mühüm rol oynayıb.

Dünya Azərbaycanlılarının V Qurultayının Şuşada keçirilməsinin əhəmiyyətindən bəhs edən S.Novruzov qeyd edib ki, bunun böyük mənəvi-siyasi əhəmiyyəti, rəmzi mənası var. İndiyə qədər keçirilmiş 4 qurultay dünya azərbaycanlılarının həmrəyliyinin güclənməsinə müstəsna töhfə verib. Beşinci qurultay isə Zəfər təntənəsidir, yeni Qələbə salnaməsinin yaradılmasıdır. Əlbəttə, Heydər Əliyev siyasətinin layiqli davamçısı olan Prezident İlham Əliyevin liderliyi, prinsipial və uzaqgörən siyasəti bu reallığı mümkün etdi və xalqımıza sonsuz qürur hissi yaşatdı. Zəfər Qurultayı zəngin dövlətçilik tariximizin parlaq səhifələrindən biri olacaq.