ZƏRDAB ŞƏHƏRİNDƏ SOVET İTTİFAQI QƏHRƏMANI MƏLİK MƏHƏRRƏMOVUN BÜSTÜ QOYULACAQDIR
AZƏRTAC xəbər verir ki, Zərdab şəhərinin mərkəzindəki Qələbə meydanında Sovet İttifaqı Qəhrəmanı Məlik Məhərrəmovun büstünün təməlinin qoyulması ilə əlaqədar mərasim keçirilmişdir.
Mərasimi açan rayon icra hakimiyyətinin başçısı Lütvəli Babayev Zərdabın Bıçaqçı kəndində boya-başa çatan Məlik Məhərrəmovun zəngin və qəhrəmanlıqlarla dolu həyat və fəaliyyətindən danışmış, cəsur həmvətənimizin büstünün Nazirlər Kabinetinin müvafiq qərarına əsasən ucalacağını bildirmişdir.
Mərasimdə Böyük Vətən müharibəsinin iştirakçısı, “Şöhrət” ordeninin hər 3 dərəcəsi ilə təltif olunan Muradalı Heydərov, Heydər Əliyev adına Azərbaycan Ali Hərbi Məktəbinin kursantı Cavid Eminov, “Cəsurlar” hərbi idman oyunlarının respublika turunda ikinci yeri tutmuş Gəlmə kənd orta məktəbi komandasının kapitanı Nurlan Qədirli və başqaları çıxış edərək, 1941-45-ci illər müharibəsində misilsiz qəhrəmanlıqlar göstərmiş həmyerliləri Məlik Məhərrəmovla fəxr etdiklərini vurğulamışlar.
Sonra büstün təməli qoyulmuşdur.
