Rusiya telekanalında “Azərbaycan. Odlar yurduna səyahət” adlı film yayımlanıb VİDEO
Bakı, 16 yanvar, AZƏRTAC
Geniş tamaşaçı auditoriyası olan və üç dildə yayımlanan “Russian Travel Guide” (RTG TV) beynəlxalq maarifləndirici telekanalda “Azərbaycan. Odlar yurduna səyahət” adlı film nümayiş etdirilib.
AZƏRTAC xəbər verir ki, müxtəlif ölkələrin tarix, mədəniyyət, incəsənət, turizm imkanlarının əks olunduğu proqramları təqdim edən RTG TV-də Azərbaycan haqqında mütəmadi olaraq filmlər göstərilir. Nümayiş etdirilən bu filmdə tamaşaçılar unikal təbiətimiz, qədim tariximiz, ölkəmizin turizm potensialı ilə tanış olurlar.
“Möhtəşəm Qafqaz dağları, geniş düzənliklər, başı dumanlı təpələr və Xəzər dənizinin sonsuz səthi. Azərbaycan Şərq və Qərb ənənələrinin və mədəniyyətlərinin cəmləşdiyi məkandır. Ölkənin hər bir şəhər və kəndinin tarixi minilliklərə gedib çıxır”. İqor Maksimenkonun müəllifi olduğu film məhz bu sözlərlə başlayır.
Azərbaycanın hər bir qarışı gəzməli və görməlidir deyən müəllif 4 hissəli filmində tamaşaçılara şahidi olduğu ən gözəl turistik marşrutları təqdim edir. Ölkəmizin dünya xəritəsində coğrafi mövqeyindən danışılır, qədim tariximizə nəzər salınır. Bildirilir ki, alov hələ qədim zamandan Azərbaycanın rəmzinə çevrilib. Yanardağda olan müəllif qeyd edir ki, Abşeronun böyük bir hissəsində alovun yerdən çıxmasının şahidi olursan. Turistlərin Odlar yurduna marağı da ilbəil artır.
İzləyicilər Bakının Suraxanı qəsəbəsindəki Atəşgah haqqında da məlumat əldə edirlər. Bildirilir ki, XVII əsrə aid məbəd UNESCO-nun qeyri maddi-mənəvi irs siyahısına salınıb. Abşeron ərazisində olan Mərdəkan qalasının yaranma tarixi və təyinatı, eləcə də açıq səma altında yerləşən “Qala” Dövlət Tarix Arxeoloji-Etnoqrafik Muzey Kompleksi haqqında dolğun məlumat verən İqor Maksimenko səyahətini Qobustanda davam etdirir. Müəllif arxeoloji qoruq haqqında danışaraq qeyd edir ki, vaxtilə Xəzər dənizinin suları altında olan bu ərazi baş verən təbii proseslər səbəbindən görkəmini dəyişir. Aşkar edilən 10 mindən çox qayaüstü təsvirlər isə bura gələn turistlərin marağına səbəb olur. Qədim insan məskəni sayılan bu ərazidə muzeyin yaradıldığını deyən müəllif vurğulayır ki, bura üz tutanlar mütləq şəkildə qədim eraya səyahət etmək imkanı əldə edəcəklər.
Azərbaycanda dünyanın üçdəbir palçıq vulkanı cəmləşib. Gördüyümüz mənzərə sanki yad bir planetdir. Mavi səma fonunda palçıq püskürən vulkanların konusları fantastik filmlərdəki kadrları xatırladır.
Ölkəmiz haqda filmin 2-ci hissəsində qeyd olunur ki, Odlar yurdunda xeyli sayda faydalı qazıntı da çıxarılır. Onların sırasında Azərbaycanın qərbində əldə edilən Naftalan neftini vurğulamaq olar. Eyniadlı şəhərdən söhbət açan müəllif burada hətta müalicə sanatoriyaların fəaliyyət göstərdiyini də deyir. Naftalan neftinin müalicəvi xüsusiyyətlərini öz üzərində hiss etmək istəyən minlərlə turist istirahət məkanlarına üz tutur.
“Russian Travel Guide” telekanalının əməkdaşı səyahətini Şamaxı-İsmayıllı-Qəbələ və Şəki marşrutu ilə davam etdirir. Qədim və zəngin tarixi keçmişə malik Şamaxıya üz tutan İqor Maksimenko Mərəzə yaxınlığındakı Diri baba türbəsi haqqında məlumatları bölüşür. Şirvan memarlıq məktəbinə aid tikilinin dağ üzərində inşa edilən unikal abidə olduğunu vurğulayır. Yeddi günbəz kompleksindən danışan müəllif Şamaxı xanlığı barədə izləyicilərə məlumat verir. Yaxın Şərqin ən qədim müsəlman memarlıq abidəsi sayılan Şamaxı Cümə Məscidi isə izləyicilərə bütün əzəməti və gözəlliyi ilə təqdim olunur. Vurğulanır ki, 1902-ci ildə güclü zəlzələ nəticəsində tamamilə dağılan məscid illər sonra yenidən tikilib. Ölkə rəhbərliyinin qayğısı sayəsində mərkəz əsaslı təmir olunaraq yeni əzəmətli görkəmi ilə ziyarətçilərin ixtiyarına verildi.
Şimal-Qərb marşrutu üzrə səyahət edən İqor Maksimenko qədim Lahıcda da olur. V əsrə aid bu tarixi məkan qoruq elan olunaraq hər il yerli və xarici turistləri cəlb edir. Filmin Qəbələyə məxsus hissəsində burada xeyli sayda qədim tarixə malik əsrarəngiz məkanların olduğunu deyən müəllif buradakı türbələrdən söz açır.
Tolerantlıq məkanı sayılan Azərbaycanda bütün dinlərin nümayəndələri sülh və mehriban şəraitdə yaşayırlar. Buna nümunə kimi filmdə orta əsrlər Albaniyasına aid udin kilsəsi göstərilir. Vurğulanır ki, Nic qəsəbəsində yaşayan qədim albanların bu etnik qrupunun öz mədəniyyəti, adət-ənənələri və dili var. Yelisey-Çotari kilsəsi isə dövlət tərəfindən bərpa edilərək udinlərin ixtiyarına verilib.
50 dəqiqəlik filmin sonuncu hissəsi müəllifin Şəkiyə səyahəti ilə yekunlaşır. Şərqin möhtəşəm şəhərlərindən olan Şəki eyniadlı xanlığın paytaxtıdır. Çox sayda tarixi abidələrin cəmləşdiyi şəhəri İqor Maksimenko açıq səma altında böyük bir muzeyə bənzədir. Müəllif xüsusilə Aşağı və Yuxarı Karvansaray, onun yaranması, tarixi və təyinatı haqda məlumat verir. Şəki Xan sarayının əzəmətindən söz açır və onu Azərbaycanın orta əsrlər memarlığının incisi adlandırır.
Bölmənin digər xəbərləri
