Müdafiə Nazirliyi: Düşmənin manevr edən zirehli texnikası bölmələrimiz tərəfindən məhv edilib VİDEO
Bakı, 1 mart, AZƏRTAC
Azərbaycan Ordusu sərəncamında olan istənilən ən müasir silahdan bütün cəbhəboyu istifadə etmək hüququna malikdir və düşmənin fəaliyyətinin qarşısını almaq gücündədir.
Bunu Xocavənd istiqamətində qoşunlarımız tərəfindən Ermənistan silahlı qüvvələrinə qarşı “SPIKE” tipli tank əleyhinə idarə olunan raketdən istifadə olunması barədə erməni mətbuatında yer alan məlumatlara cavab olaraq Müdafiə Nazirliyinin mətbuat xidmətindən AZƏRTAC-a bildiriblər.
Qeyd olunub ki, fevralın 28-də Ermənistan silahlı qüvvələrinin bölmələri öz mövqelərini möhkəmləndirmək məqsədilə zirehli texnikanı ön xəttə çıxarmağa cəhd göstərib. Düşmənin manevr edən zirehli texnikası müvafiq bölmələrimiz tərəfindən vaxtında aşkarlanaraq dərhal məhv edilib.
“Son günlər düşmənin verdiyi onlarla itkilər arasında xaricdən gətirilən erməni əsilli muzdlular çoxluq təşkil etdiyindən qarşı tərəf bu rəqəmləri məqsədyönlü şəkildə gizlədir”, - deyə Müdafiə Nazirliyinin məlumatında bildirilib.
Bölmənin digər xəbərləri
