Sofiya, 9 dekabr, AZƏRTAC

2018-ci il yanvarın 16-dan etibarən Bakı-Sofiya-Bakı aviareysinin açılması münasibətilə Bolqarıstanda Azərbaycanın turizm potensialının təşviqi məqsədilə Azərbaycanın Bolqarıstandakı səfirliyinin dəstəyi, “Bulgaria APG” və “Buta Airways” şirkətlərinin birgə təşkilatçılığı ilə Sofiyada tədbir keçirilib.

AZƏRTAC xəbər verir ki, 120 nəfərin iştirak etdiyi bu tədbirə Bolqarıstanın 44-cü xalq məclisinin sədr müavini Valeri Jablyanov, Bolqarıstan-Azərbaycan Parlamentlərarası Dostluq Qrupunun sədri Həmid Həmid və sədr müavini Dimitr Qeorgiyev, Bolqarıstanın Ticarət və Sənaye Palatasının baş katibi Vasil Todorov, Beynəlxalq Hava Nəqliyyatı Assosiasiyasının Mərkəzi Asiya üzrə regional meneceri Yordan Karamalakov, Bolqarıstanın Xarici İşlər, İqtisadiyyat, Energetika, Nəqliyyat İnformasiya Texnologiyaları və Rabitə nazirliklərinin nümayəndələri, avia və turizm şirkətlərinin təmsilçiləri, turoperatorlar və Bolqarıstanın Milli Televiziya, Bloomberg TV Bolqarıstan, “Bulgaria On Air” daxil olmaqla 10-a yaxın KİV nümayəndələri iştirak edib.

Azərbaycanın Bolqarıstandakı səfiri Nərgiz Qurbanova, Bolqarıstanın turizm nazirinin müavini İrena Qeorqiyeva və “Buta Airways” şirkətinin direktoru Cəmil Manizadə çıxış ediblər.

Səfir Nərgiz Qurbanova iki ölkə arasında yüksək səviyyəli strateji tərəfdaşlığın mövcudluğunu vurğulayaraq Azərbaycan ilə Bolqarıstan əlaqələrində nəqliyyat sahəsinin prioritet istiqamətlərdən hesab edildiyini bildirib. Ölkəmiz tərəfindən və onun iştirakı və maliyyələşdirilməsi ilə həyata keçirilən beynəlxalq nəqliyyat layihələrindən söz açan səfir bu il oktyabrın 30-da Bakı-Tbilisi-Qars dəmir yolunun açılışı və bu layihənin Bolqarıstan və daha geniş coğrafiya ölkələrinə faydası, eləcə də Azərbaycanın qatıldığı, Bolqarıstanın isə müşahidəçi statusunda iştirak etdiyi “Şimal-Cənub” nəqliyyat dəhlizi layihəsi haqqında tədbir iştirakçılarını məlumatlandırıb. N.Qurbanova ölkəmizin turizm potensialı barədə məlumat verərək hər iki tərəfin açılacaq reysdən həm də tranzit məqsədilə faydalana biləcəyini vurğulayıb. “Buta Airways” şirkətinin Avropa İttifaqı xaricindən Bolqarıstana uçan ilk aşağıbüdcəli aviaşirkət olacağını, eləcə də “Buta Airways” şirkətinin Avropa İttifaqı ölkələri arasında birinci məhz Bolqarıstana uçacağını qeyd edən səfir Bakı ilə Sofiya arasında birbaşa hava əlaqəsinin iki ölkə arasında siyasi, mədəni, biznes və iqtisadi əlaqələrin gücləndirilməsinə töhfə verəcəyini bildirib.

Nazir müavini İrena Qeorqiyeva Bolqarıstanın turizm potensialından, eləcə də son illərdə bu sahənin intensiv inkişafından bəhs edərək ölkəsinin Azərbaycan üçün maraqlı turizm istiqaməti olacağını, birbaşa hava əlaqəsinin iki ölkə arasında turizmin daha da inkişaf etdirilməsinə töhfə verəcəyini qeyd edib. O, Bolqarıstanın Turizm Nazirliyinin Azərbaycan Respublikasının Mədəniyyət və Turizm Nazirliyi ilə həm ikitərəfli əsasda, həm də Ümumdünya Turizm Təşkilatı daxil olmaqda çoxtərəfli formatda sıx əməkdaşlıq etdiyini bildirib. Hər iki ölkədə təşkil olunan turizm sərgilərində müqabil tərəfin fəal iştirakının alqışlandığını qeyd edən nazir müavini cari ilin aprel ayında Bakıda keçirilmiş XVII Azərbaycan Beynəlxalq Səyahət və Turizm Sərgisində Bolqarıstanın milli stendlə təmsil olunduğu və bu stendin Azərbaycan Prezidenti İlham Əliyev və birinci xanım Mehriban Əliyeva tərəfindən ziyarət edildiyini xüsusi vurğulayıb.

“Buta Airways” şirkətinin direktoru Cəmil Manizadə “Buta Airways” aviaşirkətin artıq 1 ildir ki, yaradıldığını, bu müddət ərzində şirkətin təhlükəsiz, müntəzəm və kommersiya cəhətdən cəlbedici xidmət təklif edərək kifayət qədər nailiyyətlər əldə etdiyini qeyd edib. Bakı-Sofiya-Bakı birbaşa hava əlaqəsinin açılması ilə bağlı hazırda aparılan işlər barədə məlumat verən C.Manizadə bu reysin uğurlu və davamlı olacağına ümidini ifadə edib.

Daha sonra “Buta Airways” şirkətinin nümayəndələri şirkət, onun fəaliyyəti, Heydər Əliyev Beynəlxalq aeroportu, eləcə də həyata keçiriləcək uçuş haqqında tədbir iştirakçılarını ətraflı məlumatlandırıblar. Tədbir “SilkWay Travel” şirkətinin Azərbaycanın turizm potensialını əhatə edən təqdimatı və iştirakçılar üçün hədiyyələr nəzərdə tutan lotereya ilə davam etdirilib. Nahar zamanı isə Azərbaycan şərab və şirniyyatların dequstasiyası təşkil edilib.

Bakı-Sofiya-Bakı birbaşa reysin təbliğatı məqsədilə səfirlik tərəfindən aparılan fəaliyyət çərçivəsində səfir Nərgiz Qurbanova Bolqarıstanın aparıcı “Bloomberg TV Bulgaria” telekanalının “İnkişafda” adlanan verilişinə müsahibə verib. Müsahibə zamanı səfir enerji sahəsində əməkdaşlığın Azərbaycan ilə Bolqarıstan arasında əlaqələrin aparıcı sahə olduğuna diqqət çəkərək iki ölkə arasında imzalanmış sazişə əsasən 2020-ci ildə təchizatın başlanması planlaşdırılan illik 1 milyard kubmetr Azərbaycan qazının Bolqarıstanın qaza olan tələbatının 1/3 hissəsini ödəyəcəyini qeyd edib. 2015-ci ildə Azərbaycanla Bolqarıstan arasında imzalanmış strateji tərəfdaşlıq haqqında bəyannamənin vacibliyini vurğulayan diplomat bu sənədin ikitərəfli əməkdaşlıq üçün yeni imkanlar yaratdığını bildirib. Nəqliyyatın prioritet sahələrdən biri olduğu, Bolqarıstanın Azərbaycan tərəfindən Avropa İttifaqı bazarına giriş kimi qiymətləndirildiyini, Azərbaycanın isə Bolqarıstan üçün Mərkəzi Asiya regionuna çıxış imkanı yaratdığını bildirən səfir Bakı-Tbilisi-Qars (BTK) dəmir yolunun açılışı və dəmir yolunun Asiya ilə Avropa arasında yük və sərnişindaşımaları üçün açdığı tarixi imkanlardan bəhs edib. Səfir Avropa İttifaqının BTK ilə bağlı bəyanatında Bolqarıstanın xüsusi vurğulandığını qeyd edib, bu ölkənin müşahidəçi qismində iştirak etdiyi “Şimal-Cənub” nəqliyyat dəhlizi layihəsi barədə məlumat verib, İKT, turizm, kənd təsərrüfatı sahəsində mövcud imkanlardan bəhs edib.

Müsahibə zamanı səfir həmçinin bildirib ki, Bakı-Sofiya-Bakı aviareysinin açılması yalnız iki ölkənin avia qurumları arasında əməkdaşlığın yaradılması deyil, həm də insanların bir araya gətirilməsi, ideya mübadiləsi, müxtəlif layihələrin birgə həyata keçirilməsi, iki ölkənin yaxınlaşması deməkdir. 2016-cı ildə 16 min Azərbaycan turistinin Bolqarıstana və 1300-ə yaxın bolqar turistin Azərbaycana səfər etdiyi bildirilib, açılacaq reysin həm iki ölkədə turizmin inkişafı, həm də ölkələrin tranzit potensialının genişlənməsinə töhfə verəcəyi qeyd olunub.

Verilişdə həmçinin turizm sahəsinə diqqət ayrılıb. Səfir Azərbaycanın təbiəti, qonaqpərvərliyi, ölkədə mövcud turizm növləri, mövcud infrastruktur və şərait barədə ətraflı məlumat verib. Diplomat qeyd edib ki, Bolqarıstan Azərbaycan turistləri üçün cəlbedici istiqamətdir və onlar Bolqarıstanda çimərlik, xizək, balneologiya, mədəni turizm və digər istirahət mərkəzlərinin mövcudluğu barədə məlumatlıdırlar.

Səfirliyin fəaliyyətində Azərbaycanın turizm sahəsinin Bolqarıstanda təbliğinə xüsusi diqqətin ayrıldığını qeyd edən N.Qurbanova 2017-ci ilin fevral ayında “Holiday&SPA EXPO” adlı XXXIV Beynəlxalq Turizm Sərgisi, aprel ayında Veliko Tırnovo şəhərində keçirilmiş “Mədəni Turizm” adlı XIV Beynəlxalq Turizm Sərgisində ölkəmizin təmsil olunduğunu bildirib. Bundan əlavə, Bolqarıstanın Plovdiv şəhərində keçirilən “VINARIA” XXV Beynəlxalq Üzümçülük və Şərab İstehsalı Sərgisi çərçivəsində baş tutmuş müsabiqədə “Hillside” qırmızı turş şərabın gümüş medala və sertifikata layiq görüldüyü, bundan əlavə dekabrın 2-də keçirilmiş 5-ci Balkan Rakia və Spirtli İçkilər festivalı çərçivəsində Azərbaycan istehsalı olan spirtli içkilərin təqdimatının keçirildiyi diqqətə çatdırıb. Sonda səfir ölkəmizdə mədəni-tarixi irsin və ətraf mühitin qorunması istiqamətində aparılan siyasət və görülən tədbirlər haqqında məlumat verib.

İqbal Hacıyev

AZƏRTAC-ın xüsusi müxbiri

Sofiya