Binəqədi rayonunda Məsud Davudoğlu küçəsinin əsaslı təmirinə başlanılıb VİDEO
Bakı, 9 yanvar, AZƏRTAC
Paytaxtın Binəqədi rayonunda Məsud Davudoğlu küçəsinin əsaslı təmiri işlərinə başlanılıb.
“Azərbaycan Avtomobil Yolları” Dövlət Agentliyinin mətbuat xidmətindən AZƏRTAC-a bildirilib ki, uzunluğu 930 metr olan küçənin eni 7-8 metr arası dəyişir. Əsaslı təmir çərçivəsində küçənin eni 11-12 metrə qədər genişləndiriləcək.
Hazırda küçəboyu köhnə asfalt-beton örtüyünün üst qatı frezlənərək kənara daşınıb. Zəruri olan yerlərdə yol yatağının yararsız qruntu qazılaraq çıxarılır, əvəzinə yararlı material tökülərək kipləşdirmə işləri aparılır. Daha sonra yolun 8 min kvadratmetrdən çox sahəsinə 2 qat olmaqla yeni asfalt-beton örtüyü döşənəcək.
Həmçinin vətəndaşların rahat və təhlükəsiz hərəkəti üçün yeni piyada səkiləri qurulur, mövcudları isə bərpa olunur. Yolboyu piyada səkilərinin kənarlarına 2 min poqonmetr uzunluğunda yeni səki daşları düzülür. Sərnişin avtobuslarının ümumi hərəkətə maneə yaratmadan dayanacaqlara giriş-çıxışını təmin etmək məqsədilə “cib”li dayanacaq hissələr yaradılır.
Aparılan təmir işləri zamanı mövcud yağış-kanalizasiya sistemi bərpa olunaraq işlək vəziyyətə salınacaq, yeni yağış barmaqlıqları, kommunikasiya xətləri üçünsə 36 ədəd yeni baxış qapaqları qoyulacaq.
Bundan başqa, hərəkətin normal təşkili üçün yol nişanları quraşdırılacaq, yolun üfüqi nişanlama xətləri çəkilərək küçədə tam yeni və müasir yol infrastrukturu yaradılacaq.
İşlərin tərtib olunmuş qrafikə uyğun yaxın müddət ərzində yekunlaşdırılması planlaşdırılır.
Bölmənin digər xəbərləri
