İqtisadi cəhətdən gəlirli sahə olan arıçılıq Tərtərdə kənd təsərrüfatının inkişaf edən sahələrindəndir VİDEO
Tərtər, 22 yanvar, Tahir Ağaməmmədov, AZƏRTAC
Arıçılıq Azərbaycanda çox qədim tarixə malikdir. Ölkəmizin əlverişli iqlimi, zəngin bitki örtüyü iqtisadi cəhətdən gəlirli olan bu sahənin inkişafını şərtləndirən başlıca amillərdəndir.
Son illər respublikamızda arıçılığın inkişaf etdirilməsi üçün məqsədyönlü tədbirlər həyata keçirilir. Cəbhə bölgəsində yerləşən Tərtər rayonunda da kənd təsərrüfatının digər sahələri kimi arıçılıq ilbəil inkişaf edir.
Tərtər Rayon Statistika İdarəsindən AZƏRTAC-ın bölgə müxbirinə bildiriblər ki, gəlirli sahə olduğundan son illər rayonda arıçılığa maraq xeyli artıb. Belə ki, beş il əvvəl rayonda 180 arıçılıq təsərrüfatı mövcud idisə, hazırda 242 ailə bu işlə məşğul olur. Rayonda arı ailələrinin sayı da hər il artmaqdadır. Əgər 2015-ci ildə rayonda 2434 arı ailəsi var idisə, indi arı ailələrinin sayı 2881-ə çatıb.
Rayonun arıçıları hər il Bakı şəhərində keçirilən arıçılıq məhsullarının respublika sərgi-satış yarmarkasına müxtəlif çeşiddə arıçılıq məhsulları çıxarırlar.
Tərtərli arıçı: “Arıçılıq məhsulları istehsalında yüksək nəticələrə
nail olmağa çalışacağıq”
Nazirlər Kabinetinin 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev arıçılığın inkişaf etdirilməsinin vacibliyini vurğulayaraq deyib: “Arıçılığın da çox böyük ixrac potensialı var. Azərbaycan dünya miqyasında arıçılıq, bal istehsalı sahəsində önəmli yer tuta bilər, müvafiq göstərişlər verilib. Əminəm ki, 2018-ci ildə yaxşı nəticələr olacaqdır”. Dövlət başçısının bu sözlərindən stimul alan tərtərli arıçılar 2018-ci ildə və qarşıdan gələn növbəti illərdə arı məhsulları istehsalında yüksək nəticələr əldə edəcəklərini bildirirlər.
Tərtərli arıçı İlqar Qasımov AZƏRTAC-ın bölgə müxbiri ilə söhbətində deyib: “Azərbaycanda arıçılığın inkişafı üçün gözəl şərait var. Qiymətli ərzaq, həm də dəyərli müalicə vasitəsi olan arıçılıq məhsulları, eyni zamanda, respublikamıza böyük məbləğdə valyuta gətirə bilər. Biz arıçılar Prezident İlham Əliyevin Nazirlər Kabinetinin iclasındakı çıxışından ruhlanaraq, təsərrüfatımızı daha da genişləndirəcək və arıçılıq məhsulları istehsalında yüksək nəticələrə nail olmağa çalışacağıq”.
Qadın arıçılar və gənclər arı südü istehsalına cəlb olunacaq
Bu yaxınlarda Azərbaycan Arıçılar Assosiasiyasının Tərtərdə rayon şöbəsi yaradılıb. İyirmi ilə yaxın müddətdə arıçılıqla məşğul olan Bəkir Ağayev assosiasiyanın rayon şöbəsinin sədri seçilib. O, Azərbaycan Arıçılar Assosiasiyasının rayon şöbəsinin yaradılmasını yüksək qiymətləndirərək, bunun Tərtərdə arıçılığın inkişafına töhfə verəcəyini deyib. Qeyd edib ki, rayonda assosiasiyaya üzv olan arıçıların vaxtaşırı görüşləri keçirilir, arıçılığın inkişafı, qarşıya çıxan problemlərin həll edilməsi, məhsuldarlığın yüksəldilməsi, arılara qulluq, müxtəlif arı xəstəlikləri ilə mübarizə və digər məsələlərlə bağlı fikir mübadiləsi aparılır. Təcrübəli arıçılar gənc arıçılara öz tövsiyə və məsləhətlərini verirlər.
Assosiasiyanın rayon şöbəsinin sədri 2018-ci ildə arıçılıq məhsulları, o cümlədən arı südü istehsalını artırmaq üçün bir sıra tədbirlərin görüldüyünü, rayonda Gənc Arıçılar Birliyi və Qadın Arıçılar Birliyinin yaradıldığını deyib. Bildirib ki, qadın arıçılar, eləcə də gənclər əsasən arı südü istehsalına cəlb ediləcəklər.
Tərtərli arıçılar ilk dəfə kandidən istifadə edir
Tərtərə səfər zamanı rayon arıçılarının ilk dəfə olaraq arı pətəklərinə kandi (arı yemi və ya arı xəmiri) verdiklərinin şahidi olduq. Avropada və Türkiyədə geniş yayılmış bu üsuldan arı ailələrini aktivləşdirmək məqsədilə istifadə edilir. Bir kiloqram kandinin 700 qramı şəkər pudrası, 300 qramı isə baldan ibarətdir. Bundan başqa, kandinin içərisinə nozemat pereparatı da əlavə edilir ki, bu da arıların erkən yazda nozematoz xəstəliyinə tutulmasının qarşısını alır.
Hazırlanan arı yemi bir paketə qoyularaq, arı ailələrinə verilir. Arı ailələrinə kandi verilməsi məhsul istehsalının artmasına səbəb olur.
“Arı halallığı və təmizliyi sevən canlıdır”
Mirsadiq Bağırov Tərtərdə ən təcrübəli arıçılardandır. Ömrünün 42 ilini bu sahəyə həsr edən arıçı sevimli peşəsi haqqında danışarkən deyib: “Arıçılıq çox maraqlı, eyni zamanda, çətin peşədir. Bu sahə insandan səbr, həssaslıq və incəlik tələb edir. Arı halallığı və təmizliyi sevən canlıdır. Arıçı da gərək buna riayət etsin. Ata-babadan arıçılıqda daim halallığa diqqət etmiş, hər şeyin təbii olmasına çalışmışıq”.
Onun təsərrüfatında hazırda 120 arı ailəsi var. 2017-ci təsərrüfat ilində pətəklərdən 800 kiloqramdan artıq bal götürən arıçı məhsulun satışında çətinlik olmadığını bildirib. “Rayonda bal istehsalçısı kimi tanındığım üçün satışda problem olmur. Kimə bal lazım olsa, gəlib evdən alır. Balla yanaşı, ana arı südünün də satışını həyata keçirirəm. Bu möcüzəli məhsul şəfaverici xüsusiyyətlərinə görə əvəzsizdir”, - deyə təcrübəli arıçı vurğulayıb.
Mirsadiq Bağırovun təsərrüfatındakı arılar balı əsasən yonca, qanqal, akasiya, biyan, böyürtkən, qaratikan və sair bitkilərdən toplayır. Respublikamızın bitki örtüyünün müxtəlifliyini nəzərə alaraq, arı ailələrinin normal inkişafını təmin etmək və yüksək məhsul götürmək üçün arılar mövsüm ərzində bir neçə yerə köçürülür.
Tərtərli arıçı müxtəlif çiçəklərdən toplanan, vitamin və minerallarla zəngin olan arı məhsullarının insan orqanizmi üçün faydalarından da danışıb: “Ən zəruri qida olan bal min bir dərdin dərmanıdır. Təsadüfi deyil ki, dünya şöhrətli təbib İbn Sina da baldan bir çox xəstəliklərin müalicəsində istifadə edib. Hazırda da təbabətdə bal vasitəsilə mədə-bağırsaq sistemi, böyrək, qaraciyər xəstəlikləri müalicə olunur. Bal orqanizmi möhkəmlədir, onu müxtəlif xəstəliklərdən qoruyur. Arı südü də insan orqanizmi üçün vacib olan zəngin tərkibə malik əvəzedilməz məhsuldur. Müalicəvi xüsusiyyətlərinə görə o, baldan da üstündür”.
Beləliklə, tərtərli arıçılar artıq növbəti mövsümün hazırlıqlarını görürlər. Onlar arıçılıq məhsulları istehsalında yüksək nəticələrə nail olmağı, bununla həm ölkə əhalisinin tələbatını ödəməyi, həm də xaricə bal ixracını qarşıya əsas vəzifə kimi qoyublar.
Bölmənin digər xəbərləri
