REGİONLAR
Torpaq mülkiyyətçiləri subsidiyalardan yararlanmaqla taxıl sahələrini artırırlar VİDEO
Xaçmaz, 1 fevral, Elxan Yusifli, AZƏRTAC
Ötən il “Aqrolizinq” Açıq Səhmdar Cəmiyyətinin Xaçmaz regional nümayəndəliyi tərəfindən şimal bölgəsinə daxil olan altı rayonun torpaq mülkiyyətçilərinə 70 faiz güzəştlə 5 min 707 ton gübrə və 4 min 515 litr pestisid satılıb.
AZƏRTAC-ın bölgə müxbiri xəbər verir ki, artıq qarşıdakı yaz-yay əkini üçün də Xaçmazdakı logistik bazaya lazımi miqdarda amofos, nitroamofos, azot, karbamid və kalsium-sulfat gübrələri gətirilib və bu iş davam etdirilir.
“Aqrolizinq” ASC-nin Xaçmaz regional nümayəndəliyinin baza müdiri Rafiq Tağıyev bildirib ki, bu mövsüm əkin sahələrindən daha keyfiyyətli və bol məhsul alınacağı gözlənilir. Çünki ötən ildən etibarən fermerlərin istəyi nəzərə alınaraq dövlət daha 3 adda mineral gübrənin təsərrüfatçılara güzəştlə verilməsinə başlayıb.
Güzəştlə verilən gübrələrdən təsərrüfatçıların lazımınca istifadə etməsi üçün Xaçmazdakı logistik bazaya mineral gübrə səpən yeni texnikalar da gətirilib. Bu günə kimi şimal bölgəsindən olan fermerlər bazadan 23 adda 500-ə yaxın kənd təsərrüfatı texnikası alıblar. Bunun 270 ədədini traktor, 50 ədədini toxumsəpən, 20 ədədini kombayn və digər kənd təsərrüfatı texnikaları təşkil edir.
Son bir ildə isə “Aqrolizinq” ASC şimal rayonlarından olan 68 istifadəçiyə güzəştli şərtlərlə, ümumilikdə, 2 milyon 197 min 47 manat məbləğində 121 ədəd müxtəlif kənd təsərrüfatı texnikası verib. Texnikaların alınması zamanı fermer və sahibkarlara 869 min 699 manat güzəşt tətbiq olunub.
Rafiq Tağıyev qeyd edib ki, hazırda yaz-tarla işləri üçün aqroservisin texnika və texnoloji avadanlıqları saz vəziyyətə gətirilib.
Dövlətin aqrar sahənin inkişafı ilə bağlı torpaq mülkiyyətçilərinə verdiyi əlavə subsidiyalar, tətbiq edilən yeni becərmə üsulları Xaçmazda taxıl istehsalının ilbəil artmasına səbəb olub. Rayonun Sayad kəndindən olan fermerlər də bu dəstəkdən faydalanaraq əkin sahələrini artırılar.
Təsərrüfatçı Zöhrab İslamov bildirib ki, ötən il 50 hektardan taxıl biçib. 2018-ci ilin məhsulu üçün isə əkin sahəsini 100 hektaradək artırıb. “Dövlət hər hektara görə bizə 90 manat pul ödəyir. Yəni, kənd təsərrüfatı texnikasına işlətdiyimiz dizel yanacağının, yağın pulunu dövlət verir. Bizə isə əkib-becərmək qalır. Bundan başqa, verilən gübrələrin 70 faizini də dövlət ödəyir. “Aqrolizinq”dən iki traktor, kombayn, toxumsəpən, gübrəsəpən almışam. Hamısı da güzəştlı qiymətlərlə, pulunu da 10 il müddətinə ödəmək şərti ilə”, - deyə təsərrüfatçı vurğulayıb.