“Sağ olsun Prezidentimiz, kənd sakinlərini narahat edən problemlərin həllinə xüsusi diqqət yetirir” – Neftçaladan reportaj VİDEO
11 min əhalinin istifadə etdiyi kənd yolu əsaslı şəkildə yenidən qurulur
Neftçala, 1 avqust, İsmayıl Cəfərli, AZƏRTAC
Azərbaycanda yol tikintisi geniş vüsət alıb. Son 15 il ərzində 15 min kilometr yol çəkilib. Bu il də kənd yollarının, şəhərlərarası yolların çəkilişi nəzərdə tutulur. Təxminən min kilometrə yaxın yolun çəkilişi planlaşdırılır. Təkcə ötən altı ayda təxminən 400 kilometrə yaxın avtomobil yolu çəkilib. Prezident İlham Əliyev iyulun 31-də Azərbaycan Respublikasının Prezidenti yanında sosial-iqtisadi sahə ilə bağlı keçirilən müşavirədə qeyd edib ki, bu istiqamətdə görülən işlər ölkəmizdə yol infrastrukturunun tamamilə yenilənməsinə gətirib çıxarıb: “Təsadüfi deyil ki, Davos Ümumdünya İqtisadi Forumunun hesabatında avtomobil yollarının keyfiyyətinə görə Azərbaycan dünyada 34-cü yerdədir. Əminəm ki, bizim yerimiz daha da irəliləyəcək. Çünki bu sahəyə doğrudan da çox böyük investisiyalar qoyulur və bundan sonra da qoyulacaq”.
Yol tikintisinin geniş vüsət aldığı rayonlarımızdan biri də Neftçaladır
AZƏRTAC xəbər verir ki, yol tikintisinin geniş vüsət aldığı rayonlarımızdan biri də Neftçaladır. Yerli əhəmiyyətli yolların əsaslı şəkildə təmiri layihələri çərçivəsində rayonun 4 yaşayış məntəqəsini əhatə edən dairəvi avtomobil yolunun əsaslı şəkildə yenidən qurulmasına başlanılıb. İşlərin yaxın aylarda başa çatdırılması nəzərdə tutulub.
Azərbaycan Avtomobil Yolları Dövlət Agentliyi tərəfindən Neftçala rayonunda təmirinə başlanılan 9 kilometrlik yerli əhəmiyyətli Boyat-Ballıcalı-Dördlər-Xıllı avtomobil yolu respublika əhəmiyyətli Salyan-Neftçala avtomagistralından ayrılaraq dairəvi şəkildə yenidən həmin yola birləşir. Layihəyə uyğun olaraq yol bir neçə marşrut üzrə 4-cü texniki dərəcəyə uyğun təkmilləşdirilir. Yolun eni 6 metr təşkil edəcək. Yolboyu lazımi yerlərdə genişləndirmə işləri aparılır. Yeni salınan yol ərazidə yaşayan 11 min əhaliyə xidmət göstərəcək.
Yeni təmir olunan yol kənd təsərrüfatının inkişafına da böyük töhfədir
50 saylı Yol İstismar İdarəsinin mühəndisi Ələddin Abbasov bildirib ki, Neftçala təsərrüfat rayonu olduğuna burada əkin-biçinlə məşğul olanlar çoxdur: “Yeni təmir olunan yol kənd təsərrüfatının inkişafına da böyük bir töhfədir. Əhalini uzun illərdir narahat edən yol tam standartlara uyğun əsaslı təmir edilir. Biz də öz işimizi keyfiyyətlə aparırıq. Çalışırıq ki, avqust ayının sonunda yolu sakinlərə təhvil verək”.
Layihə çərçivəsində yolboyu mövcud suötürücü borular yenisi ilə əvəzlənəcək. Bundan başqa, yolun müxtəlif yerlərində su ötürücülər və yol ötürücü qurğusunun tikintisi də nəzərdə tutulub. Yolda, həmçinin qaz xətlərinin və işıq dirəklərinin köçürülməsi işləri aparılacaq. Layihənin sonuncu mərhələsində isə yolboyu avtobus dayanacaqları inşa ediləcək, hərəkətin normal təşkili üçün yol nişanları və məlumatverici lövhələr quraşdırılacaq, xətlənmə işləri aparılacaq. Müasir yol infrastrukturunun yaradılması burada yaşayan sakinlərin də ürəyincədir.
Kənd sakinləri problemlərinin həllinə görə Prezidentə minnətdarlıq edirlər
Boyat kənd sakini fermer Əlihüseyin Hacıyevlə söhbət zamanı dedi ki, sakinlər tərəfindən fevral ayında dövlətimizin başçısına ünvanlanan müraciət cavabsız qalmayıb, tez bir zamanda rayonun Boyat kəndində yolun tikintisinə başlanılıb: “Gördüyünüz kimi, yolumuz əsaslı təmir edilir, yeni asfalt örtüyü çəkilir və avqust ayının ortalarına qədər əhalinin istifadəsinə veriləcək. Sağ olsun Prezidentimiz, biz kənd sakinlərini narahat edən problemlərin həllinə xüsusi diqqət yetirir, bizə daim diqqət və qayğı ilə yanaşır”.
Yolun təmir olunmasına sevinənlərdən biri də Bayramxatın Əliyevadır: “Çox sevinirik, sakinlər bunu çoxdan gözləyirdi. Yeni yol bütün işimizi asanlaşdıracaq, məktəbə gedən uşaqlarımızın ayaqları qışda palçıq olmayacaq. Bazara, dükana, rayon mərkəzinə rahat gedib-gələcəyik. Allah Prezidentimizə uzun ömür versin”.
Alimirzə Səmədov isə kəndin ağsaqqallarındandır. Dövlətimizin başçısının regionların sosial-iqtisadi inkişafına göstərdiyi diqqət və qayğıdan razılıqla danışır. “Mənim 76 yaşım var. Uzun illər Neftçalanın Boyat kəndində kolxoz təsərrüfatında işləmişəm. 26 il pambıqçılıq sahəsi üzrə briqadir olmuşam. Yolumuzun yenidən təmir olunması biz ağsaqqalları çox sevindirir. Buna görə ağsaqqallar adından, camaat adından Prezidentimizə minnətdarlıq edirəm. Allah onun canını sağ eləsin”, - deyə A.Səmədov qeyd edib.
Dörd kəndi birləşdirən Boyat-Ballıcalı-Dördlər-Xıllı avtomobil yolu ötən əsrin 70-ci illərində salınıb. Lakin o vaxtdan yolda heç bir təmir işləri aparılmayıb. Yolun əsaslı şəkildə yenidən qurulması ərazidə yaşayan vətəndaşlara respublika əhəmiyyətli Salyan-Neftçala yoluna rahat çıxış əldə etmək imkanı yaradacaq. Yol təmiri həm də kənd təsərrüfatının inkişafına da töhfə verəcək ki, bu da ərazidə yaşayan 11 min əhalinin yetişdirdikləri məhsulların rayon mərkəzinə və qonşu rayonların bazarlarına tez və xarab olmadan daşımasına imkan yaradacaq.
Bölmənin digər xəbərləri
