CƏMİYYƏT
FHN: Ötən sutka 64 halda yanğına çıxış üzrə əməliyyatlar həyata keçirilib VİDEO
Bakı, 2 sentyabr, AZƏRTAC
Ötən sutka ərzində Fövqəladə Hallar Nazirliyinin (FHN) 112 - qaynar telefon xəttinə daxil olmuş zənglər əsasında nazirliyin aidiyyəti qurumları tərəfindən 64 halda yanğına çıxış, köməksiz vəziyyətdə qalma faktı üzrə 5 və intihara cəhd faktı üzrə 1 qəza-xilasetmə əməliyyatları həyata keçirilib.
FHN-in mətbuat xidmətindən AZƏRTAC-a bildiriblər ki, görülmüş təcili və təxirəsalınmaz tədbirlər nəticəsində yanğınlar operativ qaydada söndürülüb, insanların həyatı xilas olunub. Ümumilikdə, ötən sutka ərzində səkkiz nəfər, o cümlədən dənizdə çimərlik ərazisində batma təhlükəsi olan iki nəfər, Bakı şəhərinin Nəsimi rayonunda intihara cəhd edən bir nəfər xilas edilib. Həmçinin nazirliyin dalğıc-axtarış qrupu Yuxarı Qarabağ kanalının Ağcabədi rayonunun Salmanbəyli kəndi ərazisindən keçən hissəsində batmış bir nəfərin axtarış işlərinə cəlb olunub.
FHN əhalinin və ərazilərin təbii və texnogen xarakterli fövqəladə hallardan qorunması istiqamətində fəaliyyətini davam etdirir.