2003-2018-ci illərdə məcburi köçkünlərin problemlərinin həlli sahəsində genişmiqyaslı işlər görülüb
Bakı, 12 oktyabr, AZƏRTAC
2003-2018-ci illərdə məcburi köçkünlərin problemlərinin həlli sahəsində genişmiqyaslı işlər görülüb, ölkədəki bütün çadır düşərgələri, fin tipli qəsəbələr ləğv edilib, yeni salınmış 100-dən çox qəsəbə və şəhərcikdə 265 min nəfər məskunlaşdırılıb.
AZƏRTAC xəbər verir ki, Azərbaycan Respublikası Prezidentinin ictimai-siyasi məsələlər üzrə köməkçisi-şöbə müdiri, professor Əli Həsənov Prezident İlham Əliyevin 15 illik hakimiyyət dövründə məcburi köçkünlərin problemlərinin həlli istiqamətində görülmüş bu və digər işləri diqqətə çatdırıb.
Məqalədə vurğulanır ki, 2016-cı ilin aprel ayında təhlükəsiz yaşayışı təmin olunmuş Cocuq Mərcanlı kəndi (Cəbrayıl rayonu) qısa müddət ərzində bərpa edilib, orada 150 evdən ibarət qəsəbə tikilib və köçkünlər öz doğma yurdlarına qayıdıblar. Eyni zamanda, işğaldan azad olunmuş Şıxarx qəsəbəsində (Tərtər rayonu) 1170 ailə üçün yeni şəhərcik salınıb. Bu ilin doqquz ayında 2900 məcburi köçkün ailəsi evlərlə, mənzillərlə təmin olunub. İlin sonunadək daha 2800 ailənin ev və ya mənzillərlə təmin edilməsi nəzərdə tutulur.
Əli Həsənov, həmçinin qeyd edir ki, ölkə əhalisinin sosial rifahının yaxşılaşdırılması, habelə Minilliyin İnkişaf Məqsədlərinin həyata keçirilməsi istiqamətində böyük xidmətlərinə görə Prezident İlham Əliyev 2015-ci ildə BMT-nin “Cənub-Cənub” mükafatı ilə təltif olunub.
Bölmənin digər xəbərləri
