2012-Cİ İL OLİMPİADASININ REKLAMI ÇARXI KÜTLƏVİ EPİLEPSİYA TUTMALARINA SƏBƏB OLMUŞDUR
AZƏRTAC xarici KİV-lərə istinadla xəbər verir ki, 2012-ci il Olimpiadasının tədbirin rəsmi saytında yerləşdirilmiş reklam çarxı baxış zamanı epilepsiya tutmasına səbəb ola biləcəyi barədə şikayətlərlə bağlı saytdan çıxarılmışdır.
Böyük Britaniyanın “Epilepsy Action” xeyriyyə təşkilatının məlumatına görə, 2012-ci il Olimpiadasının saytına daxil olandan sonra on nəfər şikayətlərlə müraciət etmiş və bir neçə nəfər epilepsiya tutmasına məruz qalmışdır. Saytın hazırlanmasına 400 min funt sterlinq (590,5 min avro) sərf edilmişdir.
Mütəxəssislər bildirmişlər ki, üzgüçünün hovuza tullanmasını göstərən çarxda kadrların dəyişməsi tezliyi Britaniya rabitə idarəsinin qaydalarına müvafiq deyildir.
Olimpiadanın təşkilatçısının nümayəndəsi demişdir: “Biz problemdən xəbər tutan kimi təcili tədbirlər gördük və animasiyanı saytdan yığışdırdıq. Hazırda biz onu yenidən düzəldirik”.
Bu, London Olimpiya oyunlarının rəmzləri ilə bağlı olan heç də birinci qalmaqal deyildir. Bundan əvvəl təşkilat komitəsi Oyunların rəsmi emblemini təqdim etmişdir. Emblem Olimpiada ili rəqəmlərinin rəmzi olan qeyri-düzgün çoxbucaqlılar şəklində dörd hissədən (“2”, “0”, “1”, “2”) ibarətdir.
Loqotipin hazırlanması bir il vaxt aparmış və 400 min funt sterlinqə başa gəlmişdir, nəticə ümüdləri doğrulmamışdır: emblemin cizgilərini svastika və meymun ilə müqayisə edirlər. Buna baxmayaraq, təşkilatçılar iddia edirlər ki, Olimpiadanın loqotipi “dinamik və parlaqdır”.
Bölmənin digər xəbərləri
