20 Yanvar faciəsinə həsr olunmuş mərasim
Yanvarın 19-da Almaniyada yaşayan soydaşlarımız, qardaş Türkiyə Cümhuriyyətinin Berlindəki səfirliyinin nümayəndələri 20 Yanvar faciəsinin 12-ci ildönümü ilə əlaqədar tədbirdə iştirak etmək üçün Azərbaycan Respublikasının Almaniyadakı səfirliyinə toplaşmışdılar.
Mərasim iştirakçıları əvvəlcə 1990 -ci il yanvarın 19-dan 20-nə keçən gecə sovet qoşunlarının Bakıda törətdiyi görünməmiş qəddarlığı əks etdirən fotosənədlərə baxdılar.
Vətənimizin azadlığı yolunda canlarını qurban vermiş şəhidlərin xatirəsi bir dəqiqəlik sükutla yad edildi.
Azərbaycanın Berlindəki səfiri Hüseynağa Sadıqov mərasimi açaraq, 20 Yanvar faciəsinin erməni millətçilərinə havadarlıq edən keçmiş SSRİ rəhbərliyinin düşünülmüş siyasətinin tərkib hissəsi olduğunu vurğuladı. Səfir onu da xatırlatdı ki, Azərbaycanın o vaxtkı səriştəsiz, satqın, vəzifələrini itirməkdən qorxan rəhbərləri də bu faciəli hadisələrin törədilməsində günahkardırlar. Ondan sonra hakimiyyətə gələnlər isə xalqımızın tarixinə qanla yazılmış faciəyə hüquqi-siyasi qiymət vermədilər. Yalnız görkəmli dövlət xadimi Heydər Əliyev yenidən hakimiyyətə qayıtdıqdan sonra, 1994-cü ildə 20 Yanvar faciəsinə tam hüquqi-siyasi qiymət verildi.
H.Sadıqov daha sonra Azərbaycan Prezidentinin rəhbərliyi ilə ölkəmizdə dövlət quruculuğu, demokratik islahatların həyata keçirilməsi sahəsində görülən işlərdən söhbət açdı.
Mərasimdə Cahangir Zeynallının “20 Yanvar-Qanlı Yanvar” sənədli filmi nümayiş etdirildi. Şəhidlərimizin ruhuna dua oxundu, xatirəsinə ehsan verildi.
Yusif Xəlilov
AZƏRTAC-ın xüsusi müxbiri
Berlin
Bölmənin digər xəbərləri
