20 Yanvar faciəsinin 25-ci ildönümü Suraxanıda silsilə tədbirlərlə qeyd edilir
Bakı, 16 yanvar, AZƏRTAC
20 Yanvar faciəsinin 25-ci ildönümü ilə əlaqədar Suraxanı Rayon İcra Hakimiyyəti tərəfindən silsilə tədbirlər keçirilir.
İcra hakimiyyətindən AZƏRTAC-a bildirilib ki, tədbirlər planına uyğun olaraq rayon ərazisində yerləşən bütün sənaye, təhsil, səhiyyə, mədəniyyət müəssisələrində “20 Yanvar faciəsi Azərbaycanın suverenliyi, istiqlaliyyəti və ərazi bütövlüyü uğrunda mübarizənin rəmzidir” mövzusunda xatirə tədbirləri təşkil edilir. Məktəblərdə faciə ilə bağlı rəsm, inşa yazı müsabiqələri keçirilir.
Rayonun qəsəbələrindəki şəhid məzarları və onların xatirəsinə ucaldılmış abidələr ictimaiyyətin nümayəndələri tərəfindən ziyarət olunur.
Suraxanıdakı 101 nömrəli tam orta məktəbdə keçirilən tədbirdə rayon icra hakimiyyəti başçısının müavini Sevinc Hüseynova 20 Yanvar hadisələrinin təkcə Azərbaycan xalqının faciəsi deyil, həm də tariximizin ən şərəfli səhifələrindən biri olduğunu söyləyib. Bildirib ki, Qanlı Yanvar hadisələri Azərbaycan xalqının milli bütövlüyünü təsdiqləyən ən mühüm hadisələrdən biri kimi tarixin yaddaşına əbədi həkk edilib. Bu faciə xalqı yumruq kimi birləşdirdi və bütün dünya azərbaycanlılarının gücünü göstərdi. 20 Yanvar faciəsi məhz ümummilli lider Heydər Əliyevin prinsipial və ardıcıl mübarizəsindən sonra öz hüquqi-siyasi qiymətini aldı.
Qeyd edilib ki, şəhid ailələrinin, müharibə əlillərinin və veteranlarının sosial təminatının gücləndirilməsi daim Azərbaycan Prezidenti İlham Əliyevin diqqət mərkəzindədir.
Anım mərasimində 20 Yanvar faciəsi haqqında film, məktəblilərin ifasında ədəbi-bədii kompozisiya nümayiş olunub.
Bölmənin digər xəbərləri
