“20 Yanvar hadisələrinin gənclərin vətənpərvərlik tərbiyəsində rolu” mövzusunda anım tədbiri keçirilib
Bakı, 19 yanvar, Həsrət Mahmudova, AZƏRTAC
Yanvarın 19-da Gənclər və İdman Nazirliyi tərəfindən “20 Yanvar hadisələrinin gənclərin vətənpərvərlik tərbiyəsində rolu” mövzusunda anım tədbiri keçirilib.
AZƏRTAC xəbər verir ki, əvvəlcə faciə qurbanlarının xatirəsi bir dəqiqəlik sükutla yad edilib, 20 Yanvar hadisələri ilə bağlı videoçarx nümayiş olunub.
Tədbirdə çıxış edən Milli Məclisin deputatı Qənirə Paşayeva 20 Yanvar faciəsindən illər keçməsinə baxmayaraq, bu tarixin heç vaxt unudulmayacağını bildirib. Q.Paşayeva faciənin keçmiş sovet imperiyasının insanlığa qarşı törətdiyi qanlı və amansız cinayət olduğunu diqqətə çatdırıb. Deputat xalqımızın qan yaddaşına dəhşətli faciə kimi yazılmış 20 Yanvarın, eyni zamanda, qəhrəmanlıq tariximizin şanlı səhifələrindən olduğunu bildirib.
Gənclər və İdman Nazirliyinin gənclərlə iş şöbəsinin müdiri İndira Hacıyeva, Azərbaycan Respublikasının Prezidenti yanında Dövlət İdarəçilik Akademiyasının Siyasi Araşdırmalar İnstitutunun direktoru, professor Elman Nəsirov və başqaları çıxışlarında vurğulayıblar ki, 20 Yanvar Azərbaycan tarixində qanlı səhifə olmaqla yanaşı, xalqımızın müstəqillik amalına, qəhrəmanlıq ənənələrinə sadiqliyini, Vətənin azadlığı uğrunda canından keçməyə hazır olduğunu bir daha sübut edib.
Qeyd olunub ki, Azərbaycanın milli azadlıq mübarizəsinin rəmzi olan 20 Yanvar hadisələri xalqımızın yaddaşına əbədi həkk olunaraq tariximizin parlaq səhifəsinə çevrilib.
Sonra mövzu ətrafında müzakirələr aparılıb.
Bölmənin digər xəbərləri
