20 Yanvar istiqlaliyyət tariximizin şanlı səhifəsidir
Bakı, 19 yanvar, Elvira Məmmədova, AZƏRTAC
Azərbaycan Milli Elmlər Akademiyasının (AMEA) Geologiya və Geofizika İnstitutunda (GGİ) 20 Yanvar faciəsinin 25-ci ildönümünə həsr olunmuş tədbir keçirilib.
AZƏRTAC xəbər verir ki, institutun Gənc Alim və Mütəxəssislər Şurasının (GAMŞ) həmkarlar ittifaqı tərəfindən təşkil olunan tədbiri bu qurumun sədri, geologiya üzrə fəlsəfə doktoru Orxan Abbasov açaraq 1990-cı il yanvarın 19-dan 20-nə keçən gecə sovet imperiyası və ordusu tərəfindən Azərbaycana qarşı törədilmiş qanlı qırğının təfərrüatlarından, xalqımızın azadlıq əzmindən danışıb. GAMŞ rəhbəri qeyd edib ki, 20 Yanvar hadisələri azərbaycanlıların yalnız faciəsi deyil, həm də istiqlaliyyət tarixinin şanlı səhifəsidir. Böyük tarixə malik xalqımız torpaqlarının azadlığı uğrunda canından keçməyə hazır olduğunu bir daha sübut edib. Qanlı yanvar hadisəsinə ilk dəfə Azərbaycan xalqının xilaskarı, ulu öndər Heydər Əliyev tərəfindən hüquqi-siyasi qiymət verilib. Ümummilli Lider ölkəmizin haqq səsini dünyaya çatdırmaq, beynəlxalq təşkilatları bu faciə haqqında məlumatlandırmaq işində mühüm addımlar atıb. Ulu Öndərin bu siyasəti hazırda Prezident İlham Əliyev tərəfindən uğurla davam etdirilir.
İnstitutun şöbə müdiri, professor Hikmət Mahmudov Azərbaycandan kənarda yaşayan soydaşlarımızın, xüsusən də gənc nəslin bu istiqamətdə maarifləndirilməsinin vacibliyini vurğulayıb.
Digər çıxış edənlər 20 Yanvar faciəsi ilə bağlı kədərli xatirələrini bölüşüblər.
Tədbir Qanlı Yanvar gecəsinə aid tarixi faktları əks etdirən sənədli filmin nümayişi ilə başa çatıb.
Bölmənin digər xəbərləri
