20 Yanvar-qan yaddaşımız
Bakı, 16 yanvar, AZƏRTAC
Yeni Azərbaycan Partiyasının (YAP) Naftalan şəhər təşkilatı faciənin 25-ci ildönümü ilə bağlı “20 Yanvar-qan yaddaşımız” mövzusunda tədbir keçirib.
Naftalan Şəhər İcra Hakimiyyətindən AZƏRTAC-a bildiriblər ki, tədbirdə çıxış edən YAP Naftalan şəhər təşkilatının sədri Hatəm Qocayev 20 Yanvar faciəsinin baş vermə səbəbləri ilə bağlı ətraflı məlumat verib.
Bildirilib ki, bu faciə Azərbaycanın ərazi bütövlüyünün birbaşa pozulması cəhdidir. Həmin gün keçmiş SSRİ rəhbərliyinin Azərbaycanla bağlı apardığı qərəzli siyasətə qarşı etiraz etmək üçün küçələrə çıxmış əhaliyə qanlı divan tutuldu. Bu hadisədən sonra Azərbaycan xalqı SSRİ-nin tərkibində ədaləti bərpa etməyin qeyri-mümkünlüyünə və milli haqlarımıza obyektiv yanaşma nümayiş olunacağına inamını birdəfəlik itirdi.
Vurğulanıb ki, Ulu Öndərimiz faciənin ertəsi günü ailəsi ilə birgə Azərbaycanın Moskvadakı Daimi Nümayəndəliyinə gələrək Qanlı Yanvar qırğınını törədənləri pisləyən kəskin bəyanatla çıxış etməsi o dövrdə misli görünməmiş cəsarətli addım idi. Ümummilli lider Heydər Əliyev imperiyanın Azərbaycana və onun xalqına qarşı qanlı təcavüzünə kəskin etirazını və hiddətini bildirib, faciəni törədənlərin cəzalandırılmasını tələb edib. Yalnız Azərbaycan xalqının ümummilli lideri Heydər Əliyevin ölkə rəhbərliyinə qayıdışından sonra 20 Yanvar hadisələrinə siyasi-hüquqi qiymət verilib.
Tədbirdə qeyd edilib ki, ümummilli lider Heydər Əliyevin 2000-ci il yanvarın 17-də imzaladığı Fərmanla bu faciə zamanı həlak olanlara “20 Yanvar şəhidi” fəxri adı verilib.
Bölmənin digər xəbərləri
