20 Yanvar şəhidlərinin əziz xatirəsi Təbrizdə də anılmışdır
Tehran, 19 yanvar (AZƏRTAC). Azərbaycan Respublikasının Təbrizdəki baş konsulluğunda ümumxalq hüzn günü - 20 Yanvar faciəsinin 24-cü ildönümü ilə əlaqədar anım mərasimi keçirilmişdir.
Mərasimdə İran İslam Respublikası Xarici İşlər Nazirliyinin Şimal-Qərb nümayəndəliyinin rəhbəri, Şərqi Azərbaycan Valiliyinin və Təbriz şəhər fərmandarlığının məsul işçiləri, Türkiyə Respublikasının Təbrizdəki baş konsulu və konsulluğun əməkdaşları, həmçinin şəhər ictimaiyyətinin nümayəndələri də iştirak etmişlər.
Əvvəlcə şəhidlərimizin əziz xatirəsi bir dəqiqəlik sükutla yad edilmişdir.
Azərbaycanın Təbrizdəki baş konsulu Əli Əlizadə çıxışında 20 Yanvar hadisələrinin Azərbaycanın tarixinə qanlı və eyni zamanda, şanlı hərflərlə yazıldığını, keçmiş sovet imperiyasının əsasən ermənilərdən təşkil olunmuş ordu birləşmələri tərəfindən törədilmiş bu faciənin əsas məqsədinin xalqımızın azadlıq mübarizəsini boğmaq, Azərbaycanı imperiyanın tərkibində saxlamaq, torpaqlarının bir qisminin Ermənistanın tərkibinə qatılmasını təmin etmək olduğunu bildirmişdir.
Ermənilərin tarix boyu sovet imperiyasının köməyi ilə Azərbaycan torpaqlarının bir qismini işğal etməsi ilə bağlı faktlar və azərbaycanlılara qarşı həyata keçirilən soyqırımları, terror aktları barədə məlumat verən Ə.Əlizadə 1990-cı il yanvar ayının 19-dan 20-nə keçən gecə də yüzlərlə günahsız və əliyalın Azərbaycan vətəndaşının - qadın, qoca və uşaqların vəhşicəsinə qətlə yetirildiyini diqqətə çatdırmışdır. Bu hadisələrin Azərbaycan xalqının azadlıq yolunda mübarizəsini boğa bilmədiyini, xalqımızın qələbəsi ilə başa çatdığını, Azərbaycanın müstəqil dövlət olaraq öz adını yenidən tarixə yazdığını qeyd etmişdir. Baş konsul həmin dövrdə baş vermiş qətliamın qarşısının alınması yönündə heç bir iş görməyən Azərbaycanın o zamankı rəhbərliyinin öz vəzifələrini qorumaq üçün hətta sonradan hadisələrin nəticələrini də ört-basdır eləməyə çalışdıqlarını, yalnız ümummilli lider Heydər Əliyevin həmin dövrdə Moskva şəhərində verdiyi etiraz bəyanatı, mətbuat qarşısında çıxışı nəticəsində bu hadisələrin dünya ictimaiyyətinin diqqətinə olduğu kimi çatdırıldığını, sonradan da Ulu Öndərin sayəsində bu hadisələrə siyasi-hüquqi qiymətin verildiyini vurğulamış, 20 Yanvar - ümumxalq hüzn günü ilə bağlı keçirilən mərasimə qatıldıqlarına görə iştirakçılara təşəkkür etmişdir.
İran İslam Respublikası vətəndaşı, Təbriz şəhər sakini, folklorşünas Böyükbəy Ələkbəroğlu mərasimdə çıxış edərək 1990-cı il hadisələrinin İran xalqı tərəfindən də daim xatırlandığını, SSRİ Ali Sovetinin razılığı alınmadan M.Qorbaçovun əmri ilə Azərbaycan xalqına qarşı erməni əsilli ordu birləşmələri tərəfindən həyata keçirilmiş bu qətliamın əslində bütün müsəlman aləminin kədəri olduğunu qeyd etmişdir.
Çıxışlardan sonra 20 Yanvar faciəsinə dair sənədli film nümayiş etdirilmiş və şəhidlərin xatirəsinə ehsan süfrəsi açılmışdır.
Mərasimin sonunda tədbir iştirakçılarına faciəyə dair Azərbaycan və fars dillərində məlumatlar, kitablar, DVD filmlər, qəzet və digər əyani materiallar paylanmışdır.
Mərasim iştirakçıları baş konsulluq tərəfindən hazırlanmış 20 Yanvar faciəsinə aid şəkillərdən ibarət fotostendə baxmış, işğalçı Ermənistan dövlətinin azərbaycanlılara qarşı törətdiyi terror və təcavüz aktlarından, 20 Yanvar faciəsindən bəhs edən kitab, jurnal, buklet və qəzetlərlə tanış olmuşlar.
Sabir Şahtaxtı
AZƏRTAC-ın xüsusi müxbiri
Tehran
Bölmənin digər xəbərləri
