20 Yanvar tariximizin qanlı və şanlı səhifəsidir
Naxçıvan, 19 yanvar, AZƏRTAC
Yanvarın 19-dan 20-nə keçən gecə Azərbaycan xalqının informasiya blokadasında olması, radio və televiziyanın susdurulması, mətbuatın nəşrinə qadağa qoyulması bu faciəni törədənlərin məkrli siyasətinin tərkib hissəsi idi.
AMEA Naxçıvan Bölməsinin informasiya şöbəsindən AZƏRTAC-a bildirilib ki, bu fikirlər bölmədə 20 Yanvar faciəsinin 27-ci ildönümü ilə əlaqədar keçirilən elmi konfransda səsləndirilib.
Tədbirdə əvvəlcə şəhidlərimizin əziz xatirəsi bir dəqiqəlik sükutla yad edilib.
“20 Yanvar- tariximizin qanlı və şanlı səhifəsi” mövzusuna həsr olunan konfransda bölmənin sədri, akademik İsmayıl Hacıyev Azərbaycan xalqının Vətənə, torpağa sədaqətini, azadlıq, müstəqillik uğrunda mübarizədə sarsılmazlığını bütün dünyaya göstərən 20 Yanvar faciəsinin səbəblərindən, keçmiş sovet imperiyasına rəhbərlik edən ermənipərəst quldurların xalqımıza qarşı məkrli siyasətlərindən və onların 1990-cı ildə törətdikləri qanlı cinayətlərdən ətraflı danışıb.
Akademik çıxışında 20 Yanvar tarixini təkcə Azərbaycan xalqının faciəsi günü kimi yox, həm də xalqımızın qəhrəmanlıq zirvəsi kimi dəyərləndirib.
Daha sonra AMEA Naxçıvan Bölməsinin Tarix, Etnoqrafiya və Arxeologiya İnstitutunun böyük elmi işçisi, tarix üzrə fəlsəfə doktoru Yaşar Rəhimovun “Faciəyə aparan yol”, həmin institutun şöbə müdiri, AMEA-nın müxbir üzvü Vəli Baxşəliyevin “Ümummilli lider Heydər Əliyev və 20 Yanvar faciəsi”, aparıcı elmi işçi, tarix üzrə fəlsəfə doktoru Musa Quliyevin “Azadlıq fədailəri - şəhidlər”, şöbə müdiri, tarix üzrə fəlsəfə doktoru, dosent Toğrul Xəlilovun “20 Yanvar faciəsinin nəticələri və ibrət dərsləri” mövzusunda məruzələri dinlənilib.
Məruzələrdə qeyd olunub ki, belə bir ağır vəziyyətdə Moskvada, ölkəmizdən uzaqda yaşayan ümummilli lider Heydər Əliyev Azərbaycanın daimi nümayəndəliyinə gedərək 20 Yanvar faciəsini törədənlərin cinayət məsuliyyətinə cəlb edilməsini tələb edib. Kütləvi informasiya vasitələri ilə ulu öndər Heydər Əliyevin cəsarətli bəyanatı, Azərbaycan xalqının haqq səsi, fəryadı bütün dünyaya çatdırılıb. Ümummilli Liderin ölkə rəhbərliyinə qayıdışından sonra 20 Yanvar hadisələrinin mahiyyəti açıqlanıb və hüquqi-siyasi qiymət verilib. Bu gün şəhidlərimizin adları əbədiləşdirilib, onların ailə üzvlərinə dövlət qayğısı göstərilir.
Tədbirdə Azərbaycan tarixinin həm kədərli, həm qəhrəmanlıq səhifəsi olan 20 Yanvar hadisələrinin gələcək nəsillərə əsaslı şəkildə çatdırılması istiqamətində bölmə əməkdaşlarının da öhdəsinə düşən vəzifələrdən danışılıb.
Konfransda 27 il bundan öncə Bakı şəhərində törədilən qanlı hadisənin fotoları nümayiş olunub.
Qeyd edək ki, AMEA Naxçıvan Bölməsinin Mərkəzi Elmi Kitabxanasında 20 Yanvar faciəsinin 27-ci ildönümü ilə əlaqədar “20 Yanvar” başlığı altında sərgi də təşkil edilib. 1990-cı il yanvarın 19-dan 20-nə keçən gecəni əks etdirən jurnal, qəzet və kitab materiallarının yer aldığı sərgi bu ayın sonunadək nümayiş olunacaq.
Bölmənin digər xəbərləri
