Nikolayev, 19 yanvar, AZƏRTAC

Bu dəfə yolumuz Ukraynanın cənub ərazisi Nikolayev şəhərinədir. Nikolayev vilayəti demək olar ki, Rusiya silahlı qüvvələrindən azad edilsə də, Kinburn yaşayış məntəqəsi və ona bitişik ərazilər hələ də Rusiyanın nəzarətindədir. Bu ərazilərdən Nikolayev vilayətinin bir sıra yaşayış məntəqələri, xüsusilə Oçakov şəhəri intensiv atəş altında saxlanılır.

Nikolayev şəhərinin özündə isə müharibənin dəhşətli dağıntılarına rast gəlmək olur. Şəhərdə olarkən gün ərzində bir neçə dəfə həyəcan siqnalı çalındığının şahidi oluruq.

Müharibə başlayan ilk gündən Nikolayev şəhərinin işğal edilməsi Rusiyanın əsas planlarından biri olub. Bunun bir çox səbəbləri var idi. Lakin başlıca səbəblərdən biri Nikolayevin gəmi istehsalçısı kimi dünyada ad qazanmasıdır. Dünyada ən böyük gəmiqayırma mərkəzlərindən biri kimi tanınan Nikolayev şəhərində hələ ötən əsrdə sualtı qayıqlar, esmineslər, kreyserlər, dünya texniki səviyyəli qorxunc döyüş gəmiləri inşa edilib. Xüsusilə Nikolayevdə istehsal olunan aviadaşıyıcı gəmilər dünya üçün daha qorxunc hesab edilirdi. Buna Nikolayev adına Gəmiqayırma və Donanma Zavodunda vaxtilə inşa edilmiş iki sualtı qayıq əleyhinə vertolyot daşıyan “Moskva”, “Leninqrad” və beş ağır təyyarə daşıyan kreyser - “Kiyev”, “Minsk”, “Novorossiysk”, “Bakı” (sonradan “Admiral Qorşkov” adlandırılıb), “Tbilisi”ni (“Admiral Kuznetsov”) misal çəkmək olar. Bu hərbi gəmilərin çoxu SSRİ dağıldıqdan sonra Rusiyanın balansına keçib və bu gün də Qara dəniz donanmasında Ukraynaya qarşı istifadə edilir.

Rusiya-Ukrayna müharibəsində Сənub cəbhəsində ön xətt hesab edilən Nikolayev şəhərinin müdafiəsində göstərdikləri xidmətə görə bəzi soydaşlarımız fəxri fərmanla təltif ediliblər. Nikolayevin meri Oleksandr Senkevic, Ukrayna Azərbaycanlıları Radasının (UAR) vilayət üzrə təmsilçisi Zaur Ağabəyovu və onun şəhər radasının deputatı olan oğlu Ramil Ağabəyovu şəhərin müdafiəsində göstərdikləri xidmətlərə görə fəxri fərmanla təltif edib. Ukrayna vətəndaşı olan soydaşlarımız Rusiya-Ukrayna müharibəsi nəticəsində yaranmış ən ağır günlərdə humanitar yardımlarda aktiv iştirak ediblər. Elə buna görə də Nikolayev vilayət Administrasiyasının rəhbəri Vitali Kim müharibənin ilk günlərindən yerli xalqa göstərdiyi maddi, humanitar dəstəyə görə soydaşımız Zaur Ağabəyova təşəkkürnamə təqdim edib. Nikolayev vilayətinin qubernatoru bu soydaşımızın timsalında Ukraynada yaşayan bütün azərbaycanlı fəallara təşəkkürünü bildirib.

Zaur Ağabəyov AZƏRTAC-a açıqlamasında bildirib ki, müharibəyə qədər Nikolayev vilayətində qeyri-rəsmi məlumatlara görə 10 minə yaxın soydaşımız yaşayıb.

Müharibə zamanı bəzi soydaşlarımız-qadınlar, uşaqlar daha təhlükəsiz yerlərə göndərilsə də, əsasən kişilər Nikolayev vilayətində qalıb və əhaliyə, hərbçilərə humanitar yardımları ilə tanınıblar. “Biz həmişə Nikolayev əhalisinin yanında olmuşuq və öz köməkliyimizi əsirgəməmişik”,- deyə Zaur Ağabəyov əlavə edib.

Zaur Ağabəyovun oğlu, Nikolayev şəhər sovetinin deputatı Ramil Ağabəyov isə reportaj zamanı AZƏRTAC-a açıqlamasında vurğulayıb ki, artıq Nikolayev sakinləri öz evlərinə qayıdırlar. Rəsmi məlumata görə, 50 mindən 70 minə qədər Nikolayev sakini bu günədək evinə qayıdıb. İndi şəhərdə əsasən sakitlik olsa da elə ərazilər var ki, onlar hələ də işğalçıların nəzarətindədir. Məsələn, bu Kinburn yaşayış məntəqəsidir. Bu yaşayış məntəqəsi hələ də işğalda olduğuna görə təəssüf ki, Oçakov şəhəri də əziyyət çəkir. Bu yaxınlarda orada partlayışlar olub. Həmin partlayış dalğası nəticəsində təxminən 5 min evə ziyan dəyib. “Biz Ukrayna Silahlı Qüvvələrinə inanırıq, qalib gələcəyimizə inanırıq”, - deyə Ramil Ağabəyov vurğulayıb.

Emil Hüseynli

AZƏRTAC-ın xüsusi müxbiri

Nikolayev