Göyçayda selin törətdiyi fəsadlar aradan qaldırılır REPORTAJ FOTO VİDEO
Göyçay, 30 avqust, R.Türkoğlu, AZƏRTAC
Avqustun 27-də güclü leysan yağışlarından sonra Göyçaya gələn selin törətdiyi fəsadlar aradan qaldırılır.
AZƏRTAC-ın bölgə müxbiri xəbər verir ki, rayonun Qaraməryəm kəndində bəzi evlərə dolan lil qatı əşyaları yararsız hala salıb. Evdə yaşamaq mümkün olmadığından, sakinlər məcburən qonşuların həyətində gecələyirlər. Zərərçəkən, keçmiş məcburi köçkün Tehranə Balayeva deyir ki, sel suları onun qaldığı evi yararsız hala salıb: “Yataq və qonaq otaqları, mətbəx, mebellərim, məişət avadanlığımız, toyuq-cücəmiz, taxılımız - hamısı lil qatının altında qalıb. Bir neçə gündür qohumlarımızın evinə sığınmışıq”.
Ərazidə olan digər yaşayış evləri də sel sularına məruz qalıb. Həyətlərdə olan yardımçı tikililər, saxlanc yerləri, zirzəmilər, meyvə ağacları və bostan sahələri, arıxanalar yararsız hala düşüb. Bundan əlavə, yaşayış massivinə gedən avtomobil yolundakı körpü uçub, nəqliyyatın hərəkətində ciddi çətinlik yaranıb.
Sel Aşağı Qaraməryəm kəndində də problemlər yaradıb. Sel suları nəticəsində kənd ərazisində olan iki böyük körpü dağılıb. Kənd elektrik enerjisi ilə təmin edilsə də, hələ də qazın və içməli suyun bərpası mümkün olmayıb.
Göyçay rayon fövqəladə hallar komissiyasının (FHK) sədri İkram Vəliyev açıqlamasında bildirib ki, selin törətdiyi fəsadlar aradan qaldırılır. Sel səbəbindən rayonun 5 kəndində yararsız vəziyyətə düşən rabitə və elektrik naqilləri, dirəklər artıq bərpa olunub. Bəzi ərazilərdə isə qaz və su təsərrüfatının bərpası davam edir. Eyni zamanda, Aşağı Qaraməryəm kəndində selin dağıtdığı körpülərdən biri daxili imkanlar hesabına bərpa olunur: “Beş kənd üzrə qaz, su, işıq xətləri, o cümlədən telefon dirəkləri ziyan çəkdi və bu ziyanın aradan qaldırılması üçün rayon icra hakimiyyəti tərəfindən komissiya yaradıldı. Komissiya dəymiş ziyanı müəyyənləşdirib, bununla bağlı aidiyyəti qurumlara müraciət olunub. Kəndlərə dəymiş ziyanın aradan qaldırılması üçün işlərə başlanılıb. Bütün kəndlərdə işıq və telefon dirəkləri bərpa olunub. Həmçinin içməli suyun verilişi də tamamlanacaq. Bundan başqa, üç körpü uçub, artıq birində işlər yekunlaşmaq üzrədir”.
Qaraməryəm kəndi ərazisində keçmiş məcburi köçkün olan 25 ailənin yaşadığını bildirən İkram Vəliyev qeyd edib ki, bu ailələrin qaldığı yerə gedib-gəlmək üçün istifadə olunan körpü də uçub. “Körpüyə baxış keçirmişik. Çalışırıq ki, tezliklə bərpa olunsun. Orada iki ailə var ki, onlara daha çox ziyan dəyib. Həmin evlərdə yaşamaq mümkün deyil. Ona görə də aidiyyəti qurumlara müraciət olunub. Dəymiş ziyanın qısa müddətdə aradan qaldırılmasına çalışırıq”, - deyə o əlavə edib.
Xatırladaq ki, bir neçə gün əvvəl bölgəyə yağan güclü yağışdan sonra yaranan sel suları Göyçayın Yekəxana, Yuxarı və Aşağı Qaraməryəm və Qarayazı kəndlərinin yollarına, elektrik və rabitə təsərrüfatına ziyan vurub. Evlər, otlaq sahələri və bir sıra iaşə obyektləri sel sularının, bir neçə avtomobil isə lil qatının altında qalıb.
Bölmənin digər xəbərləri
