Şabranın badam bağlarından məhsul yığımına başlanılıb - REPORTAJ VİDEO
Şabran, 5 sentyabr, Elxan Yusifli, AZƏRTAC
Şabranın badam bağlarından məhsul yığımına başlanılıb.
AZƏRTAC-ın bölgə müxbiri xəbər verir ki, rayonun Ağalıq kəndində əkilən 23 hektar badam bağından bu il 100-130 ton arası məhsul yığılması gözlənilir.
Badam ağaclarının böyüməsi, həm də keyfiyyətli aqrotexniki qulluq nəticəsində bu il məhsuldarlıq daha da artıb. Ağaclar tam məhsula düşəndən sonra hər hektardan 6-10 ton badam yığmaq mümkündür.
Təsərrüfatçı Ariz Ağamalıyev bildirib ki, bu ildən badam məhsulunu toplamaq üçün yeni texnologiya tətbiq ediblər.
“Həmişə badamı ağacdan əllə yığırdıq. Əl çatmayan meyvələri isə vurub yerə tökürdük. Belə də badam ağacları zədələnirdi. Aqro sərgilərin birində zeytun ağacından meyvə silkələmək üçün olan avadanlıq diqqətimizi çəkdi. Bildirdilər ki, badam toplanmasında da yararlanmaq olar. Bu ildən məhsulu İtaliya istehsalı olan həmin avadanlıq vasitəsilə ağacdan toplayırıq. İşimizi xeyli yüngülləşdirib”, - deyə Ariz Ağamalıyev qeyd edib.
O bildirib ki, bağda iki növ badam becərilir. 10 hektarda amerikan mənşəli “Guara”, 13 hektarda isə Fransadan gətirilən badam növü yetişdirilir: “İlk saldığımız bağlardan artıq beşinci ildir ki, məhsul toplayırıq. Ötən il 100 ton məhsul yığmışıq. Bu il məhsuldarlıq daha yaxşıdır.
Yığılan badam qurutma məntəqələrində qurudulduqdan sonra yerli bazarda satılır.
“İndi yığımın qızğın çağıdır. Məhsulu toplayıb, qurudub, qabığını təmizləyirik. Biz badamı ləpəyə ayırmadan satışa çıxarırıq. Bir kiloqramının qiyməti 2,5-3,5 manat arasında dəyişir. Ləpə halında isə badamın bir kiloqramı 15-20 manata satılır”, - deyə A.Ağamalıyev söyləyib.
Son illərdə şimal bölgəsində Şabranla yanaşı, Siyəzən və Qusarda da badam bağları salınıb. Ən çox badam bağı Siyəzən rayonu ərazisindədir. “Samur-Abşeron suvarma sisteminin yenidən qurulması” layihəsinin icrası nəticəsində rayonda yeni istifadəyə verilən suvarılan torpaqlarda 200 hektar sahədə badam ağacları əkilib.
Kənd Təsərrüfatı Nazirliyinin Meyvəçilik və Çayçılıq Elmi-Tədqiqat İnstitutu tərəfindən xaricdən gətirilən badam sortunun tinglərinin istehsalı üçün də iş aparılır. Bununla gələcəkdə badam tinglərinin idxalının qarşısı yerli istehsal hesabına alınacaq.
Bölmənin digər xəbərləri
