Tovuzda üzüm bağlarında yığım davam edir – REPORTAJ VİDEO
Tovuz, 15 sentyabr, AZƏRTAC, Ruslan Novruzoğlu
Tovuzda üzüm plantasiyalarından məhsul yığımı davam edir. Bu il iqlim şəraitinin qeyri sabit keçməsi məhsuldarlığa müəyyən dərəcədə mənfi təsir göstərib. Havanın yaz boyu və yayın əvvəllərindən yağıntılı keçməsi üzüm bağlarında xəstəliklərin yayılmasına da şərait yaratmış oldu. Eyni zamanda, üzümçülük ilboyu olduqca həssas və mürəkkəb zəhmət tələb edən təsərrüfat sahəsi olduğundan fermerlərin diqqət yetirməli olduğu bir sıra məqamlar da var.
Mütəxəssislərin bildirdiyinə görə, üzüm bağlarından yüksək məhsul əldə etmək üçün fermerlər bir neçə amilə diqqət yetirməlidir. Bunlar: düzgün aqrotexniki qulluq, dərman preparatlarından vaxtında və düzgün, normativə uyğun olaraq istifadə etmək, suvarmanı vaxtlı-vaxtında təşkil etməkdir. Belə olduğu halda sahələrdən yüksək məhsul əldə etmək mümkündür.
AZƏRTAC-in bölgə müxbiri üzümçülüklə məşğul olan bir necə fermerlə builki məhsuldarlıqla bağlı söhbət edib. Fermerlər deyirlər ki, yazdan bəri havaların bölgədə yağıntılı keçməsi bir sıra xəstəliklərə səbəb oldu ki, bu da məhsuldarlığı aşağı saldı. Xəstəliyin qarşısını almaq üçün istifadə etdikləri dərmanların keyfiyyətinin zəif olmasını da buna təsir edən əsas amillərdən biri kimi qeyd edirlər. “Yaman xəstəliklər oldu. Dəqiq bilmirik ki, bu yağışla bağlıdır, yoxsa dərmanların keyfiyyətsiz olması ilə?! Mövsüm başa çatmaq üzrədir, amma hələ maya dəyərimizi çıxara bilməmişik”, - deyə fermer Sabir Məmmədov bildirib.
Fermerlər üzümü elə sahələrdən yığıb oradaca satışını təşkil etsələr də xəstəlik müşahidə edilən üzüm salxımlarını sağlam üzümdən ayırmaq üçün onlar əlavə vaxt və maliyyə cəhətdən xərc sərf etməli olurlar. Bağ sahibləri bu il də qarşılaşdığı “mildium” xəstəliyinin qarşısını almaqda aciz qalıblar. Xəstəlik üzüm salxımı yeni çiçəklədiyi dövrdən başlayır və salxımı sonda məhv edir. “Son 3 ildə üzümdə xəstəliklər çox yaranır. Dərmanın zəifliyindəndir. Bizə çox ziyan vurur, qazancımız az olur. “Holdium”, “mildium” xəstəliyi çox müşahidə olur. Bunun da qarşısını almaq olmur”, - deyə fermer Mansur Həsənov əlavə edib.
Fermer Hafiz Abbasəliyev isə deyir ki, üzüm çiçəkləyən zaman yağıntılar oldu və bu da müəyyən qədər məhsuldarlığa təsir göstərdi. Bəzi salxımların meyvəsi seyrək oldu. “Yay da çox isti keçdi. Elə günlər oldu ki, temperatur 40-42 dərəcəsı yüksəldi. Bunun qarşılığında da məhsuldarlıq aşağı düşdü. Sortların arasında Merlot üzümü bir az istiyə dözümlüdür. Digərləri isə elə də dözümlü deyil. Məhsulun yığımına qədər adətən 8-9 dəfə dərmanlama aparırıq. Lakin bu il 12-13 dəfə dərman vurmuşuq. Hətta 15 dəfə edənlər də var”, - deyə, fermer Hafiz Abbasəliyev vurğulayıb.
Üzüm bağlarında müşahidə edilən xəstəliklərlə bağlı məsələyə Tovuz Dövlət Aqrar İnkişaf Mərkəzi Bitkiçilik sektorundan bildirdilər ki, fermerlər üzüm bağlarında xəstəliyin qarşısının alınması tədbirlərini vaxtında həyata keçirməlidirlər. Bunun üçün ilk növbədə aqrotexniki tədbirləri həyata keçirmək lazımdır. Dərmanlardan düzgün istifadə olunmalıdır ki, xəstəlik və zərərvericilərdə immunitet yaranmasın. Həmçinin bildirildi ki, dərman düzgün dozalarda, düzgün qaydada istifadə olunmalıdır. Fermerlər keyfiyyətli dərmanlara üstünlük verməlidirlər ki, etdikləri qabaqlayıcı tədbirlər də öz təsirini göstərsin.
Qeyd edək ki, hazırda Tovuz rayonunda 1100 hektar üzüm bağları mövcuddur ki, onun da 15.9 hektarı bu il salınan yeni bağlardır.
Bölmənin digər xəbərləri
