ABŞ-da pandaların yaşadığı yeganə zooparkdan FOTOREPORTAJ VİDEO
Vaşinqton, 27 aprel, AZƏRTAC
ABŞ-ın paytaxtı Vaşinqtonda yerləşən Smitsonian Milli Zooparkı dünyanın ən məşhur zooparklarından biridir. Bura həm nadir faunanın qorunduğu və araşdırıldığı elm və maarifləndirmə mərkəzidir. 1889-cu ildə qurulan bu zoopark Smitsonian İnstitutunun bir hissəsi olaraq fəaliyyət göstərir. Zooparkın ərazisi təxminən 66 hektardır. Burada 390-dan çox növə aid 2700-dən artıq heyvan saxlanılır. Ən fərqli xüsusiyyəti isə zooparka girişin pulsuz olmasıdır.
AZƏRTAC-ın ABŞ bürosunun Smitsonian Milli Zooparkından hazırladığı reportajı təqdim edirik:
Smitsonian Zooparkının ən məşhur sakinləri pandalardır. Bura ABŞ-da pandaların yaşadığı yeganə zooparkdır. 1972-ci ildə ABŞ Prezidenti Riçars Niksonun Çinə səfəri zamanı iki panda Smitsoniana hədiyyə olunub. Bu hadisə dünya tarixində “Panda diplomatiyası” adı ilə qalıb. Çin “Panda diplomatiyası” çərçivəsində pandaları başqa ölkələrə icarə müqaviləsi ilə göndərir. Pandalar adətən 10-15 illik icarə müddəti ilə verilir, sonra geri qaytarılır. Balaları doğulursa, onlar da Çinə məxsus olur və müəyyən yaşdan sonra geri aparılır. Smitsonianda da uzun illər yaşamış 3 panda 2023-cü ilin noyabrında Çinə geri qaytarılıb.
Lakin 2024-cü ilin dekabrında zooparka Bao Li və Qinq Bao adlı 2 panda gətirilib. Bu pandalar zooparka ən çox ziyarətçi cəlb edən heyvanlardır. Dünyanın və ABŞ-ın müxtəlif yerlərindən ziyarətçilər məhz pandaları görmək üçün zooparka gəlirlər. Pandalar üçün zooparkda yüksəksəviyyəli şərait yaradılıb. Onlar bambukla dolu geniş sahələr, xüsusi iqlimi olan qapalı bölmələr və müasir baytarlıq xidmətləri ilə təmin olunub.
Zooparkda rast gəlinən başqa maraqlı canlılardan biri nəhəng Aldabra tısbağasıdır. Bu, dünyanın ən böyük və uzunömürlü tısbağa növlərindən biridir. Smitsoniandakı tısbağa yarım əsrdən çox yaşı ilə zooparkın ən yaşlı sakinlərindən biridir. Onların çəkisi 250 kiloqramdan artıq olur və bəzən 150 ildən çox yaşayırlar. Bu növ tısbağalar yaşadıqları iqlimə uyğunlaşaraq suyu burunları vasitəsilə içirlər.
Burada, həmçinin qapalı binada dünyanın ən uzun zəhərli ilanı olan kral kobrası və digər müxtəlif növ ilan, kərtənkələ, tısbağalar və timsahlar saxlanılır.
Zooparkda, həmçinin dünyanın ən nadir pələng növü olan Sumatra pələngi yaşayır. Onların sayı təbiətdə cəmi 400-dən az qalıb. Zoopark onların qorunması və artırılması üçün xüsusi proqram həyata keçirir.
Afrika şiri isə burada geniş sahədə ailə strukturuna uyğun şəraitdə saxlanılır. Bu yırtıcıların zooparkdakı ömrü orta hesabla 20 ilə qədər uzana bilir.
Smitsonian Zooparkında həm Afrika, həm də Asiya növündən olan fillər var. Onlar ailə qrupları şəklində yaşayırlar. Burada ən qeyri-adi bölmələrdən biri də böyük primatlar üçün nəzərdə tutulub. Zooparkda əsasən Sumatra oranqutanları saxlanılır. Sumatra oranqutanları ağıllıdır və alətlərdən istifadə etmək bacarığına malikdirlər.
Bundan əlavə, qırmızı panda, okapi, uzunayaqlı, tülküyəbənzər canavar və digərləri zooparkın nadir heyvan növlərinə malik sakinləridir.
Zoopark həm də bioloji tədqiqatların, genetik araşdırmaların və nəsilartırma proqramlarının aparıldığı mərkəzdir.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
