Azərbaycanın Müstəqillik Günü münasibətilə Kişineuda qəbul təşkil olunub VİDEO
Kişineu, 23 may, AZƏRTAC
Moldovanın paytaxtı Kişineuda Azərbaycanın Müstəqillik Günü münasibətilə qəbul təşkil olunub.
AZƏRTAC xəbər verir ki, Azərbaycanın bu ölkədəki səfirliyinin təşkilatçılığı ilə keçirilən tədbirdə Moldova Parlamentinin spikeri İqor Qrosu, energetika naziri Dorin Junqietu, Moldovanın sabiq prezidenti Pyotr Luçinski, bu ölkənin sabiq Baş nazirləri Kirill Qaburiç, İon Kiku, deputatlar, xarici ölkələrin səfirlikləri, ictimai-siyasi xadimlər, diplomatlar, İkinci Qarabag müharibəsinin qaziləri, diaspor fəalları iştirak ediblər.
Qəbul Azərbaycanın və Moldovanın Dövlət himnlərinin ifası ilə başlayıb.
Sonra çıxış edən Azərbaycanın Moldovadakı səfiri Ülvi Baxşəliyev bildirib ki, 28 May xalqımızın azadlıq və müstəqillik uğrunda mübarizə tarixinə qızıl hərflərlə yazılmış bir gündür. 1918-ci il mayın 28-i Şərqdə və bütün müsəlman aləmində ilk demokratik respublika olan Azərbaycan Xalq Cümhuriyyətinin yarandığı gündür. Amma çox təəssüf ki, qurulandan iyirmi üç ay sonra respublika süqut etdi. Bu, bir daha onu göstərir ki, müstəqilliyi qoruyub saxlamaq onu əldə etməkdən daha çətindir. 1918-ci ildə qaldırılan bayraq 1920-ci ildə endirilib. Bundan sonra Ulu Öndər Heydər Əliyev bu bayrağı ilk dəfə Naxçıvan Muxtar Respublikası Ali Məclisinin sessiyasında rəsmi olaraq qaldırıb və təsis edib. Praktiki olaraq müstəqilliyə gedən yol bu tarixi andan başlayıb.
“Azərbaycan müstəqilliyini bərpa etdikdən sonra ilk illərdə böyük çətinliklərlə, ərazilərinin müəyyən hissəsinin Ermənistan silahlı qüvvələri tərəfindən işğalı ilə üzləşmişdi. Bununla belə, Ali Baş Komandan, Prezident İlham Əliyevin rəhbərliyi ilə Azərbaycan Ordusu 2020-ci ildə 44 günlük Vətən müharibəsi zamanı ərazilərimizin əksəriyyətini işğaldan azad edə bildi. Həmçinin 2023-cü ilin sentyabrında öz ərazilərimizi tam bərpa etdik. Təəssüf ki, işğal dövrü ərzində Ermənistan həmin ərazilərdə bir milyondan artıq mina yerləşdirib ki, bu da öz növbəsində ərazilərimizin bərpasını çətinləşdirir və insanların həyatı üçün ciddi təhlükə yaradır. İşğaldan azad olunmuş ərazilərimizdə bu günədək 400-ə yaxın vətəndaşımız minaların partlaması nəticəsində həlak olub və ya ağır yaralanıb”, - deyə Ülvi Baxşəliyev əlavə edib.
Sonra Moldova Parlamentinin spikeri İqor Qrosu çıxış edərək Azərbaycanın Müstəqillik Günü münasibətilə təşkil olunmuş qəbulda iştirakdan böyük şərəf hissi duyduğunu bildirərək deyib: “Bu il biz Moldova Respublikası ilə Azərbaycan arasında diplomatik münasibətlərin qurulmasının 33-cü ildönümünü qeyd edirik və onların dinamikası müsbətdir. Hər iki ölkənin ortaq cəhətləri var. Bütün bu illər ərzində ölkələrimiz beynəlxalq səviyyədə tanınmış sərhədlər çərçivəsində bir-birinin suverenliyini və ərazi bütövlüyünü dəstəkləyib. Azərbaycan Moldova üçün həm ikitərəfli, həm də beynəlxalq əməkdaşlıqda mühüm tərəfdaşdır. Moldova parlamenti adından Azərbaycan xalqına ən səmimi təbriklərimi çatdırır, sülh, inkişaf və davamlı firavanlıq arzulayıram”.
Moldova Elmlər Akademiyasının prezidenti İon Tiginyanu isə AZƏRTAC-a açıqlamasında Azərbaycan xalqını Müstəqillik Günü münasibətilə təbrik edərək deyib: “Azərbaycandakı dostlarımıza gözəl əməkdaşlıq üçün təşəkkür edirəm. Moldova Elmlər Akademiyasının prezidenti kimi təsdiq edə bilərəm ki, son 10 ildə biz elmi əlaqələrimizi möhkəmləndirmişik. Hər iki ölkənin müvafiq qurumları arasında əməkdaşlıq sazişi mövcuddur. Birgə konfranslarımız olur. Mən Bakıda olmuşam. Azərbaycan xalqının qonaqpərvərliyinin, təbiətinizin gözəlliyinin heyranı olmuşam. Mən inanıram ki, biz gələcəkdə də əməkdaşlıq körpümüzü daha da möhkəmləndirəcəyik. Alimlərimiz uğurla əməkdaşlıq edirlər və dünya elminə öz ciddi töhfələrini verirlər”.
Tədbirin sonunda Azərbaycanın milli rəqsləri, xüsusilə Moldovada fəaliyyət göstərən həftəsonu Azərbaycan dili məktəbinin şagirdlərinin ifası qonaqların marağına səbəb olub.
AZƏRTAC-ın xüsusi müxbiri
Kişineu
Bölmənin digər xəbərləri
