Sos kəndində yeni səhifə: Ümid dolu dönüş VİDEO
Xocavənd, 16 sentyabr, Aydın Yavərzadə, AZƏRTAC
Sos kəndi işğaldan azad edildikdən sonra yenidən canlanır. Kənd əsl sahiblərinə qucaq açıb.
AZƏRTAC-ın bölgə müxbiri xəbər verir ki, Sos kəndində 10 ailə olmaqla 46 nəfər doğma məkana qayıdıb. Ölkə rəhbərinin kəndə gəlişi isə sadəcə, rəsmi bir səfər deyildi, həm də Sosun öz taleyini yazdığı gün idi.
Dövlət başçısı kənddə görülən işlərlə tanış olub, yerli sakinlərlə görüşüb.
Kənddə məskunlaşan ailələrdən biri də Gülməmmədovlardır. Gözlərində uzun illərin həsrəti olan Famlet Gülməmmədov deyir ki, buraya qayıdacaqları günü böyük ümidlə gözləyiblər. "Bu torpaq bizimdir, ata-babamızın yadigarıdır. Prezidentimizin dəstəyi ilə yenidən evimizdə yaşamaq çox böyük xoşbəxtlikdir. Uzun illər məcburi köçkün həyatı yaşadıq, ötən bu vaxtlarda çətinlikərimiz olsa da ümidimizi heç vaxt itmədik. İnanırdıq ki, mütləq doğma torpağımıza qayıdacağıq. Övladlarımızı da bu ümidlə böyütdük, Qarabağ haqqında, bu yerlərin mənzərəsi, gözəlliyi, səfası barədə onlara hər zaman danışdıq və onları torpaqlarımızın azad ediləcəyinə inandırdıq. Onlar da bu torpaqlara gələndə həsəd apardılar və bizim onlara təsvir etdiyimizdən də gözəl olduğuna şahidlik etdilər. Kəndimizdə yaşamaq üçün hər bir şərait yaradılıb. Dövlət başçımıza təşəkkür edirik ki, qısa müddətdə kənddə belə şərait yaradılıb”, - deyə o bildirib.
Kənd sakini məşğuliyyət barədə də artıq planlarının olduğunu deyir. "Bu torpaqlar çox münbit və məhsuldardır. Düşünürəm ki, burada üzüm bağı, meyvə bağı salım, eyni zamanda, heyvandarlıq təsərrüfatı yaradım".
Qeyd edək ki, kəndin elektrik və qaz xətləri bərpa olunub, subartezian quyuları işə salınıb, üç su anbarı yenidən istifadəyə verilib. Beş kilometr uzunluğunda yeni qaz xətti çəkilib, iki transformator quraşdırılıb, sayğaclaşdırma işlərinə start verilib. Amma ən önəmlisi, bu texniki işlərin arxasında duran insan hekayələridir. Sosda 259 ev var: 70-i tam yararsız, 189-u qismən yararlı. Artıq 10 ev tam istifadəyə verilib, ilin sonuna qədər 75 ev, 2026-cı ildə isə 104 evin bərpası nəzərdə tutulur.
Sos kəndi indi təkcə bərpa olunmuş evlərdən ibarət deyil. Burada hər küçə, hər yol, hər həyət yeni ümidləri daşıyır. Bu kəndin hekayəsi həm də Azərbaycanın gücünün, dövlətimizin diqqətinin və insanların iradəsinin sübutudur. Sos kəndi artıq keçmişin xatirəsi deyil, gələcəyə ümid dolu yeni bir səhifədir.
Bölmənin digər xəbərləri
