“Söz verdi ki, Polad Həşimovun yolunu davam etdirəcək” – Şəhid gizirin həyat yoldaşı VİDEO
Şəmkir, 28 sentyabr, Vüsalə Cənnətova, AZƏRTAC
Beş il bundan öncə, sentyabrın 27-də başlayan Vətən müharibəsi cəmi 44 gün ərzində Müzəffər Ali Baş Komandan İlham Əliyevin rəhbərlik etdiyi şanlı Azərbaycan Ordusunun böyük Qələbəsi ilə başa çatdı. Vətənin mərd övladları bəşər tarixində misli görünməmiş qəhrəmanlıq, vətənpərvərlik nümayiş etdirib, dünya hərb sahəsində yeni döyüş təcrübəsi yaratdılar. İşğaldan azad olunan torpaqların hər daşında bir şəhidin izi qaldı. Canını Vətənə fəda edənlərdən biri də gizir Emin Alməmmədov oldu.
AZƏRTAC-ın bölgə müxbiri xəbər verir ki, şəhid Emin Akif oğlu Alməmmədov 1989-cu il fevralın 27-də Şəmkir şəhərində anadan olub. 1996-cı ildən 2007-ci ilədək Cahangir Rüstəmov adına tam orta məktəbdə təhsil alıb. Şəhidin anası Xədicə Abdullayevanın sözlərinə görə, Emin məktəbi bitirdikdən sonra ancaq hərbi sahəyə yönələciyini deyib. 2012-ci ildə Şəmkir şəhər N saylı hərbi hissəyə MAHHXHQ əsgər kimi işə qəbul olub. Həmin müddətdə göstərdiyi xidmətlərinə görə çavuş rütbəsinə layiq görülüb. 2018-ci il tarixində Azərbaycan Respublikası Silahlı Qüvvələrinin Təlim və Tədris Mərkəzində gizir rütbəsi ilə fəaliyyət göstərib və idarəetmə maşın heyəti rəisi ixtisası kursunu bitirib. “Ən yaxşı top komandiri” adı uğrunda keçirilən yarışlarda yüksək nəticələr göstərən Alməmmədov fəxri fərmanla təltif olunub. Gizir 2020-ci ilin sentyabrına kimi Şəmkir, Tovuz, Goranboy, Ağstafa və Daşkəsən rayon hərbi hissələrində xidmət edib.
“Atası hərbçi idi. 1992-ci ildə cəbhəyə könüllü yollanmışdı, döyüşlərdə yaralanmışdı. Emin deyirdi ki, mən də hərbçi olacağam. Balam arzusuna çatdı, ancaq axıradək davam edə bilmədi. Sentyabrın 26-da digər oğlum gəlib dedi ki, Emin zəng edib. Dedim aşağı enəcəksənmi? “Enməyəcəyəm, gedəcəyəm” - dedi və güldü. O gülüşü ölənədək unutmayacağam. Bilsəydim sonuncu danışığımızdır, telefonu qardaşıma verməzdim”, - deyə şəhid anası bildirir.
Azərbaycan Ordusunun giziri Emin Alməmmədov 2020-ci il sentyabrın 27-də Murovdağ istiqamətində gedən döyüşlərdə şəhid olub. Şəhid sentyabrın 29-da Şəmkir şəhərində torpağa tapşırılıb. Həyat yoldaşı Mələk Alməmmədova deyir ki, Emin hər zaman Vətənə, torpağa bağlı olub, övladları Əbəlfəz və Xədicəyə də daim bu sevgini aşılayıb. Ailəsi, dostları, qohumları onunla həmişə fəxr edib. “Heç nədən qorxmazdı, Aprel və Tovuz döyüşlərində iştirak edib. Tovuz döyüşlərindən gələndə evdə ağladı, dedi biz Polad Həşimov kimi bir qəhrəmanı itirmişik. Söz verdi ki, onun yolunu davam etdirəcək. Elə də oldu. Sentyabrın 26-da zəng edib dedi ki, narahat olmayın, sadəcə üçünüz də baş-başa durun, sizi doyunca görüm. Emin son mesajında da uşaqları mənə əmanət edib və deyib ki, getdiyi yolun dönüşü yoxdur”, - deyə Mələk Alməmmədova xatırlayır.
Gizir Emin Alməmmədov Prezident İlham Əliyevin Sərəncamına əsasən, ölümündən sonra 3-cü dərəcəli “Vətənə xidmətə görə” ordeni, “Vətən uğrunda”, “Hərbi xidmətlərə görə”, “Kəlbəcərin azad olunmasına görə” medalları ilə təltif edilib.
Bölmənin digər xəbərləri
