Naxçıvanda məhdud fiziki imkanlı şəxslərin və istedadlı qadınların rəsm və əl işlərindən ibarət sərgi-satış yarmarkası keçirilir VİDEO
Naxçıvan, 15 oktyabr, AZƏRTAC
Oktyabrın 15-də Naxçıvan şəhərindəki Heydər Əliyev Sarayında “Konstitusiya və Suverenlik İli” çərçivəsində məhdud fiziki imkanlı şəxslərin və istedadlı qadınların rəsm və əl işlərindən ibarət sərgi-satış yarmarkasının açılış tədbiri baş tutub.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın bölgə müxbirinə bildirilib ki, yarmarkanın keçirilməsində məqsəd xalqımızın ailə dəyərlərinin qorunub saxlanılması, adət-ənənələrinin yaşadılması, milli və xalq tətbiqi sənət nümunələrinin təbliğ edilməsi, həmçinin qadınların özünüməşğulluqlarının təmin edilməsi və istedadlarının üzə çıxarılmasıdır.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyinin əməkdaşı Günay Nəzərova bildirib ki, artıq ənənə halını almış bu sərgi-satış yarmarkası ictimaiyyət tərəfindən böyük maraq və rəğbətlə qarşılanır. O qeyd edib ki, bu kimi tədbirlər qadınların yaradıcılıq potensialının üzə çıxarılmasına, onların cəmiyyətə inteqrasiyasına və iqtisadi müstəqilliyinin təmin olunmasına mühüm töhfə verir.
Günay Nəzərova vurğulayıb ki, sərgidə nümayiş etdirilən hər bir əl işi qadınların zövqünü, bacarığını və zəhmətini əks etdirir. Qeyd edilib ki, bu tədbir qadınlara öz qabiliyyətlərini göstərmək, yeni imkanlar qazanmaq və özlərinə inamlarını artırmaq üçün mühüm platformadır.
Komitənin sədri Ramilə Seyidova bildirib ki, bu tədbir həm də xüsusi bir günə təsadüf edir, çünki dövlət başçısı İlham Əliyevin ilk dəfə Azərbaycan Prezidenti seçilməsinin 22-ci ildönümüdür. Bu tarixi gün həm ölkəmiz, həm də qadınların sosial və iqtisadi inkişafı üçün böyük əhəmiyyət kəsb edir.
Vurğulanıb ki, qadınların əl işlərindən ibarət bu tədbir artıq 16 ildir davam etdirilir. 16 il əvvəl qadınların bu sahədə iştirakı onlarla ölçülürdüsə, bu gün onların sayı yüzlərlədir. Bu artım həm qadınların yaradıcılıq potensialının tanınması, həm də onların sosial həyatdakı rolunun güclənməsi baxımından böyük əhəmiyyət daşıyır. Bu gün artıq qadınların 10 mindən artıq əl işi sərgilənir.
Qeyd edilib ki, “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı” çərçivəsində yaradılacaq Regional Ailə Mərkəzləri xüsusi qayğıya ehtiyacı olan qadınlara dəstək göstərəcək, onların sosial inteqrasiyasına və iqtisadi fəaliyyətə cəlb edilməsinə imkan yaradacaq.
Komitə sədri qadınlara göstərilən diqqət və qayğıya görə Prezident İlham Əliyevə minnətdarlığını bildirib. O, qadınların üzərlərinə düşən vəzifələri layiqincə yerinə yetirəcəyinə və gələcəkdə də cəmiyyətimiz üçün önəmli töhfələr verməyə davam edəcəklərinə əminliyini ifadə edib. Sərgi-satış yarmarkasının 10 gün davam edəcəyini deyib və yekun tədbirdə əl işlərinə görə fərqlənən qadınların təltif ediləcəyini vurğulayıb.
Naxçıvan Muxtar Respublikasının əmək və əhalinin sosial müdafiəsi nazirinin müavini, nazir vəzifəsini müvəqqəti icra edən Fərid Bağırzadə bildirib ki, “Konstitusiya və Suverenlik İli” çərçivəsində muxtar respublikada müxtəlif tədbirlər həyata keçirilir. Rəsm və əl işlərinin ictimai nümayişi üçün nəzərdə tutulan bugünkü layihənin reallaşdırılması istedadlı, məhdud fiziki imkanlı şəxslərin cəmiyyətə inteqrasiyası üçün böyük perspektivlər açmaqla bərabər, onların yaradıcılıq əzmini də artırır. Bu tədbir xüsusilə qadınların sosial müdafiəsinin gücləndirilməsi baxımından böyük əhəmiyyət kəsb edir.
Fərid Bağırzadə Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevaya qadınların sosial müdafiəsinin gücləndirilməsi istiqamətində görülən mühüm işlərə və atılan addımlara görə dərin minnətdarlığını ifadə edib.
İstedadlı qadın Əzizə Məmmədova qeyd edib ki, bu sərgilər qadınların ailədə maddi vəziyyətinin yaxşılaşdırılmasına və sosial fəaliyyətlərinin genişləndirilməsinə dəstək rolunu oynayır. O, həmçinin vurğulayıb ki, bu tədbirlər qadınlara yüksək motivasiya verir və onların gələcəkdə bu kimi tədbirlərdə fəal iştirak etmələrinə imkan yaradır.
Sonra sərgi-satışa baxış olub.
Yarmarka oktyabrın 25-dək davam edəcək.
Bölmənin digər xəbərləri
