44 günlük haqq savaşında sağlamlığını fəda edən zabit bu gün də Vətənə xidmət edir VİDEO
Daşkəsən, 18 oktyabr, Vüsalə Cənnətova, AZƏRTAC
44 günlük Vətən müharibəsinin sonundakı şanlı Zəfərlə bütöv Azərbaycan reallığını Müzəffər Ali Baş Komandan İlham Əliyevin rəhbərliyi ilə qalib Azərbaycan Ordusu yaratdı. Fədakar, qəhrəman, məğlubedilməz Vətən övladları gözlərini qırpmadan ana yurdun yolunda canlarını da fəda etdilər, sağlamlıqlarını da.
AZƏRTAC-ın bölgə müxbirinin verdiyi məlumata görə, belə cəsur oğullarımızdan biri də Ceyhun Əliyevdir.
Ceyhun Məşdi oğlu Əliyev 1988-ci il iyunun 24-də Daşkəsən rayonunun Aşağı Daşkəsən kəndində dünyaya göz açıb. Şəhid Gündüz İsmayılovun adını daşıyan orta məktəbi bitirdikdən sonra Gəncə Dövlət Universitetinin bədən tərbiyəsi fakültəsinə qəbul olunub. 2006-2008-ci illərdə ordu sıralarında xidmət edib, Vətən qarşısındakı borcunu ləyaqətlə yerinə yetirib. 2010-cu ildən isə müddətdən artıq həqiqi hərbi qulluqçu kimi ömrünü orduya bağlayıb. Ön xətdə yerləşən hərbi hissələrin birində xidmət edib. Hələ kiçik yaşlarından idmana həvəs göstərən Ceyhun 2012-ci ildə yunan-Poma güləşi üzrə Silahlı Qüvvələr birinciliyində üçüncü olub. 2016-cı ildə zabitlik kursunu bitirərək leytenant rütbəsi alıb. 2020-ci ilin iyulunda, Tovuz döyüşləri başlayan ərəfədə Ceyhun bölük komandirinin müavini kimi ön xətdəki hərbi hissələrdən birinə təyin edilib. Ta uşaqlıqdan düşməndən qisas almaq, işğal altında olan torpaqlarımızı azad etmək istəyi igid hərbçini öz peşəsinə daha da ruhlandırıb.
“Qan yaddaşımıza baxırdım. Xalqımıza edilən haqsızlıqları bilirdim. Mən ordu sıralarında xidmətə başladım, kəşfiyyatçı oldum. Xidmətim dövrümdə də erməni təxribatları ilə qarşılaşırdıq. Generalımız Polad Həşimovun şəhid olmasını eşidəndə postda hamı ağlayırdı, hamıda bir qisas hissi var idi”, - deyən Ceyhun Əliyev 44 günlük Vətən müharibəsinin ilk günlərindən döyüşlərə qatılır.
Hərbçi qardaşı Tural Əliyevlə birgə qəhrəmancasına vuruşur. Yoldaşları ilə düşmənə qan udduran cəsur zabit Murovdağ istiqamətində gedən döyüşlərin birində ağır yaralanır. “Snayper gülləsi məni qolumdan yaraladı. Əl qumbarasını atdılar, qəlpə sol ayağıma girdi. Ruh yüksəkliyi ilə döyüş yoldaşım İntiqamı çağırdım, dedim “qardaşım, döyüşməyə davam et, mən özümü partladacağam. Bircə atam, iki övladım bilsinlər ki, sağlığımda qisasımı almışam. Əlimi tutub dedi ki, “getmərəm, ölsəm səninlə öləcəyəm, qalsam səninlə qalacağam”. “Toçka Məhərrəm” ləqəbli zabit yoldaşım var idi, həmin qrupa mərmi endirdi və İntiqama dedi ki, “artıq Ceyhunu çıxara bilərsən”, - deyən qazi şanlı qələbənin xəbərini böyük qürurla yaşadığını da xatırlayır.
Vətən savaşının alovundan üzüağ çıxan, ağır əməliyyatlar nəticəsində həyata qayıdan Ceyhun Əliyev iki oğul övladı - Turan və Hüseynə Vətənə sevgisini, mərdliyi, qorxmazlığı aşılayır. O, həm də müəllim olaraq şəhid Mikayıl Mustafayevin adını daşıyan Bayan kənd tam orta məktəbində çağırışaqədərki hazırlıq fənnini tədris edir. Deyir ki, sağlam, milli, vətənpərvər ruhda gənclər yetişdirməkdən, Vətənə yenə də xidmət etməkdən böyük qürur hissi duyur. Məktəbin şagirdləri 2023-cü ildə "Şahin" hərbi-idman oyunları üzrə rayon birincisi olublar, sonrakı illərdə isə hərbləşdirilmiş idman oyunlarında uğur qazanıblar. Ceyhun Əliyev döyüşlərdə göstərdiyi şücaətlərə görə Prezident İlham Əliyevin müvafiq sərəncamlarına əsasən, “Vətən müharibəsi iştirakçısı”, “Kəlbəcərin azad olunmasına görə”, “Döyüşdə fərqlənməyə görə” medalları ilə təltif olunub. O, “Şücaətə görə” medalına da layiq görülüb.
Bölmənin digər xəbərləri
