“Turistik kənd” layihəsi: İlisu kəndi – təbiəti, tarixi və mədəniyyəti ilə turistlərin sevilən məkanı VİDEO
Qax, 22 oktyabr, AZƏRTAC
Turizm ölkəmizdə qeyri-neft sektorunun prioritet istiqamətlərindən sayılır. Milli iqtisadiyyatın inkişafı üzrə Strateji Yol Xəritəsində də bu sahəyə xüsusi önəm verilib.
AZƏRTAC-n bölgə müxbiri xəbər verir ki, Dövlət Turizm Agentliyi yeni “Turistik kənd” layihəsinə başlayıb. Bu layihəyə daxil olan kəndlərdən biri də Qaxın İlisu kəndidir.
Böyük Qafqaz dağlarının ətəyinə sığınan İlisu ölkəmizdə il boyu ən çox qonaq qəbul edən yaşayış məntəqələrindən biridir. Tarixi memarlıq abidəsi Ulu körpü isə bu qədim diyarın vizit kartı hesab olunur.
İlisunun zəngin təbiəti, çoxəsrlik tarixi, mədəniyyət və arxeoloji abidələri, yerli əhalinin maraqlı dialekti və əlbəttə mətbəx mədəniyyəti də buraya yerli və xarici turistlərin marağını artıran amillərdəndir. Elə bu səbəbdəndir ki, ölkəmizin turizm xəritəsində müxtəlif bölgələri əhatə edən 8 yaşayış məntəqəsi “Turistik kənd” kimi qeyd olunur və bu istiqamətdə yeni konsepsiya hazırlanır. Layihədə İlisunun qeyd edilməsi isə heç də təsadüf deyil. Belə ki, İlisu tarixən infrastruktura malik olub və bu gün də ilin bütün fəsillərində bura qonaqlı-qaralıdır.
İlisu Tarix-Mədəniyyət Qoruğu və İlisu Dövlət Təbiət Qoruğu turistlərin diqqətini çəkən məkanlardandır. Qeyd edək ki, İlisuda 15-ə yaxın müxtəlif tarix-mədəniyyət abidəsi mühafizə olunur. Məhz bu amildən çıxış edən Dövlət Turizm Agentliyi İlisuda turizmin daha da şaxələnməsinə start verib.
Şəki Regional Turizm İdarəsinin rəisi Şahin Məlikov bildirir ki, kənd ekoturizm və mədəni irs nümunələri ilə çox zəngindir. “Turistik kənd” layihəsinin məqsədi icma əsaslı turizmin formalaşdırılması, yerli əhalinin məşğulluğunun təmin olunması, qonaqlar üçün müəyyən infrastrukturun yaradılması və turistlərə təqdim olunmasıdır”, - deyən idarə rəisi sözlərinə onu da əlavə edir ki, agentliyin həyata keçirdiyi digər maraqlı layihə isə Dövlət Məşğulluq Agentliyi ilə birgə icra olunur. Belə ki, kənd icmasının üzvləri evlərində qonaq qarşılamaq üçün müxtəlif ev avadanlıqları ilə təmin edilir. İndiyə kimi İlisuda 8 ailə 17 adda ev və məişət avadanlıqları ilə təmin olunub.
“Bəs turistik kəndlərin inkişaf konsepsiyasında hansı yeniliklər nəzərdə tutulur?”, - deyə Regional Turizm İdarəsinin rəisinə sual ünvanlayırıq. Şahin Məlikov deyir ki, kəndin giriş hissəsində müvafiq infrastrukturun qurulması, bərpa işlərinin aparılması, ümumi istirahət yerlərinin bərpası işləri nəzərdə tutulur. “Hesab edirik ki, bütün bu işlər regionda, həmçinin İlisu və Sarıbaş kəndlərində turizmin inkişafına ciddi töhfə verəcək”, - deyə o əlavə edir.
Qeyd edək ki, Dövlət Turizm Agentliyi tərəfindən Qusarın Laza, Qubanın Qrız, Qaxın İlisu və Sarıbaş, Qəbələnin Duruca, İsmayıllının İvanovka, Lerikin Bibiyani və Astaranın Sım kəndi "Turistik kənd" konsepsiyasına uyğun turizm infrastrukturu layihəsinə daxil edilib. Layihənin məqsədi turistlər üçün cəlbedici ola biləcək kəndlərin vizual görünüşünü yaxşılaşdırmaq, kəndləri abadlaşdırmaq və bununla turizm və onun ətrafında məşğulluq imkanlarını genişləndirməkdir.
Bölmənin digər xəbərləri
