Xaçmazın Mürşüdoba kənd məktəbinin əsaslı təmiri və ya yenidən tikintisi ilə bağlı məsələ qeydiyyata alınıb - Açıqlama VİDEO
Xaçmaz, 28 noyabr, Elxan Yusifli, AZƏRTAC
Azərbaycan dövləti təhsil infrastrukturunun inkişafına böyük dəstək göstərərək, yeni məktəb binalarının inşasını və mövcud məktəblərin əsaslı təmirini geniş miqyasda həyata keçirir. Bu siyasət sayəsində, 2003-cü ildən indiyədək minlərlə məktəb binası tikilib və ya əsaslı təmir edilib, şagirdlər üçün müasir təhsil şəraiti yaradılıb. Lakin bəzi ucqar kəndlərdə hələ də istifadəyə yararsız və ya qəzalı vəziyyətdə olan məktəblər mövcuddur. Bu cür məktəblərin də qısa zamanda yenidən qurulması və ya təmiri ümumi təhsilin keyfiyyətinin daha da yüksəldilməsində vacib məsələ olaraq qalır. Belə məktəblərdən biri də Xaçmaz rayonunun Mürşüdoba kənd tam orta məktəbidir. Məktəbin binası qəzalı vəziyyətdədir.
AZƏRTAC-ın bölgə müxbiri xəbər verir ki, 1947-ci ildə cəmi iki otaqda ibtidai məktəb kimi fəaliyyətə başlayan təhsil ocağı sonradan genişləndirilib. 1960–1990-cı illərdə kənd sakinlərinin dəstəyi ilə məktəb üçün əlavə sinif otaqları tikilib. İndi təhsil ocağında 16 sinif otağı var. Məktəbdə iki növbədə 308 şagird təhsil alır.
Məktəb Mürşüdoba və Sabiroba kəndlərinin şagirdlərini qəbul edir. Bu iki kənddə, ümumilikdə, 600-dən çox ev var. Lakin köhnə və qəzalı məktəb binasında uşaqların müasir tələblərə uyğun təhsil alması üçün şərait yoxdur.
Binanın qəzalı vəziyyətdə olması səbəbindən təxminən 70-ə yaxın şagird digər məktəblərə – əsasən rayon mərkəzinə üz tutmağa məcbur olur. Bu isə həm şagirdlər, həm də valideynlər üçün əlavə çətinlik yaradır.
“Mənim 10 nəvəm bu məktəbdə təhsil alır. Bina yararsız vəziyyətdədir. Valideynlər məcbur olub uşaqları 10 kilometr aralıda yerləşən başqa məktəblərə aparırlar”, – deyə kənd sakini Tofiq Aslanov söyləyib.
Mürşüdoba sakini Elvin Ağayev bildirir ki, məktəbdə tədrisin səviyyəsindən razı olsa da, binanın qəzalı vəziyyəti valideynləri ciddi narahat edir: “Şəraitsizlikdən uşaqlar başqa məktəblərə yönləndirilir. Bu bina yararsızdır. Yeni məktəbin inşasına ehtiyac var”.
Məktəbin binasında cari təmir işləri aparılsa da, heç vaxt əsaslı təmir edilməyib. Dam örtüyü bir dəfə dəyişdirilib, lakin indi yenidən yararsız vəziyyətə düşüb.
“Buradakı müəllimlərdən razıyıq. İstəyirik uşaqlarımız öz kəndimizdə təhsil alsın. Amma şərait yoxdur deyə başqa məktəbə göndəririk”, – deyə Sabiroba kənd sakini Elvin Seyidquliyev bildirib.
Sakinlər yeni məktəb binasının inşasını zəruri hesab edirlər. Onların sözlərinə görə, həm təhlükəsizlik, həm də tədrisin keyfiyyəti üçün kənddə müasir məktəb tikilməsinə böyük ehtiyac var.
“Son illərdə Azərbaycanın hər yerində yeni, müasir məktəblər tikilir. Burada 400-ə yaxın şagird təhsil alır. Mürşüdoba kəndində yeni məktəb binası tikilsə yaxşı olar. İstəyirik ki, övladlarımız işıqlı sinif otaqlarında dərs öyrənsinlər”, - deyə kənd sakini Cahid Qədimov söyləyib.
Quba–Xaçmaz Regional Təhsil İdarəsindən AZƏRTAC-ın bölgə müxbirinə bildirilib ki, Xaçmaz rayonu Mürşüdoba kənd tam orta ümumtəhsil məktəbinin mövcud vəziyyətindən xəbərdardırlar. “Binanın əsaslı təmiri və ya yenidən tikintisi ilə bağlı məsələ qeydiyyata alınıb. Təhsil müəssisələrinin tikinti və təmiri növbəlilik və prioritetlik prinsipi əsasında həyata keçirilir”, – deyə sorğuya cavabda qeyd olunub.
Regional Təhsil İdarəsinin əməkdaşı Murad Qəribov isə əlavə edib ki, son iki ildə Quba–Xaçmaz Regional Təhsil İdarəsinin tabeliyində olan 67-dən çox məktəbdə cari, 12 məktəbdə isə əsaslı təmir işləri həyata keçirilib. Eyni zamanda, 5 modul tipli məktəb istifadəyə verilib, 8 məktəb binası isə tam sökülərək yenidən inşa edilib.
Hazırda Quba, Qusar və Şabran rayonlarında yeni məktəb binalarının tikintisi davam edir. Belə ki, Quba rayonunun Hacıhüseynli kəndində 528 şagird yerlik məktəb binası, Qusar rayonunun Kuzunqışlaq kəndində 220 şagird yerlik məktəb binası, Şabran rayonunun Ağalıq kəndində isə 648 şagird yerlik tam orta ümumtəhsil məktəbinin tikintisi aparılır.
Bölmənin digər xəbərləri
