Nurəddin Mehdixanlı: Söz insanın həm gücü, həm də məsuliyyətidir VİDEO
Bakı, 12 avqust, AZƏRTAC
İnsanın dediyi hər söz onun düşüncəsini və dünyagörüşünü əks etdirir. Lakin dilə gətirilən söz artıq yalnız danışana aid olmur, onun cəmiyyətdə müəyyən təsir və nəticələri yaranır. Buna görə də insan söylədiyi fikrin mümkün nəticələrini əvvəlcədən düşünməli, sözünün məsuliyyətini dərk etməlidir. Xüsusilə sosial şəbəkələrdə hər kəsin geniş auditoriyaya müraciət etmək imkanının olduğu bir dövrdə sözə və ifadələrə diqqətli yanaşmaq daha böyük əhəmiyyət daşıyır.
Bu fikirləri AZƏRTAC-a müsahibəsində Azərbaycanın Xalq artisti Nurəddin Mehdixanlı söyləyib. O vurğulayıb ki, Azərbaycan dilinin saflığının qorunması və söz mədəniyyətinin inkişaf etdirilməsi cəmiyyət üçün mühüm məsələlərdən biridir. Xüsusilə sosial şəbəkələrdə hər kəsin geniş auditoriyaya fikir çatdırmaq imkanı qazandığı bir dövrdə nitqə məsuliyyətli yanaşmaq daha da vacibdir. İnsan söylədiyi hər bir sözün məsuliyyət daşıdığını unutmamalı, danışmazdan əvvəl fikrinin mahiyyətini və mümkün nəticələrini nəzərə almalıdır.
“Sözü ağzında saxla, sonra o səni ovucunda saxlayar” fikrinin mahiyyətinə toxunan sənətçi bunun, ilk növbədə, insanın söylədiyi sözə sahib çıxması ilə bağlı olduğunu qeyd edib. Onun sözlərinə görə, insan bir fikri dilə gətirənədək həmin sözə özü nəzarət edir. Lakin söz deyildikdən sonra artıq onun təsiri və yaratdığı nəticələr insanın iradəsindən kənara çıxa bilər. “Yüz ölç, bir biç” ifadəsini xatırladan Xalq artisti qeyd edib ki, insan deyəcəyi sözün nəticəsini əvvəlcədən düşünməlidir. Çünki söz sonradan həm müəyyən problemlərin yaranmasına səbəb ola, həm də insanın cəmiyyətdəki nüfuzuna təsir göstərə bilər.
Nurəddin Mehdixanlı qeyd edib ki, hazırda sosial şəbəkələr vasitəsilə hər kəs öz fikrini geniş auditoriyaya çatdırmaq imkanına malikdir. Lakin bu imkanla yanaşı, ifadə olunan fikrə görə məsuliyyət də artır. Bu gün sosial şəbəkələr vasitəsilə hər kəs söz deyir, fikir bildirir, danışır, amma nə dediyinin fərqində deyil. Bu da cəmiyyətimizdə müəyyən problemlər yaradır. Söz mədəniyyətinin formalaşması yalnız düzgün danışmaqdan ibarət deyil. Burada insanın özünü, milli kimliyini, mənəvi dəyərlərini və cəmiyyət qarşısındakı məsuliyyətini dərk etməsi də mühüm rol oynayır.
“Biz özümüzü tanımalıyıq. Özümüzü tanıyanda sözümüzü tanıyacağıq, sözümüzə sahib çıxmağı bacaracağıq. Sözümüzün əsiri olmayacağıq. Biz ruhumuzun, fikrimizin əsiri olacağıq, dürüstlüyün, elmin əsiri olacağıq”, - deyə müsahibimiz qeyd edib.
Xalq artisti sözlə ehtiyatlı davranmağın vacibliyini vurğulayaraq bildirib ki, insanın dilindən çıxan hər bir ifadə artıq cəmiyyətə yönəlmiş mesajdır. Buna görə də xüsusilə ictimaiyyət qarşısında danışan şəxslər, eləcə də sosial media istifadəçiləri ifadələrinə diqqətlə yanaşmalıdırlar.
“Söz nə qədər ki, deməmisən, onun sahibisən, sən onun ağasısan. Amma deyəndən sonra artıq o sənin ağandır. Sözə münasibətdə məsuliyyətli yanaşmanın formalaşdırılması həm gənc nəslin dünyagörüşünün, həm də ümumilikdə cəmiyyətin nitq və ünsiyyət mədəniyyətinin inkişafı baxımından mühüm əhəmiyyət daşıyır”, - deyə Nurəddin Mehdixanlı bildirib.
Bölmənin digər xəbərləri
