43 yaşında karyerasını bitirən basketbolçu: Fiziki baxımdan indi də oynaya bilərəm – MÜSAHİBƏ
Bakı, 2 sentyabr, AZƏRTAC
Bir neçə gün əvvəl idmançı karyerasını bitirən Azərbaycan millisinin sabiq basketbolçusu Zaur Paşayev AZƏRTAC-a müsahibə verib.
– Karyeranızı başa vurarkən geridə qoyduğunuz illəri və qazandığınız uğurları necə dəyərləndirirsiniz?
– 43 yaşımda basketbolçu karyeramı başa vurdum. Şadam ki, bu yaşa qədər oynamaq imkanım oldu. Karyeram ərzində müxtəlif uğurlar qazandım. İslam Həmrəylik Oyunlarında, Kiçik Avropa Qitələri Kubokunda, Gürcüstan və Azərbaycan çempionatlarında qalib olmuşam. Bunlar mənim üçün çox dəyərli nailiyyətlərdir. Bundan sonra məşqçilik fəaliyyətinə başlayacağam. Hələlik harada və hansı formada çalışacağım dəqiqləşməyib. Yaxın zamanda bununla bağlı məlumat bəlli olacaq.
– İlk oyununuzu necə xatırlayırsınız? Həm milli, həm də klub səviyyəsində unutmadığınız xüsusi bir qarşılaşma varmı?
– İlk yaddaqalan uğurum 15 yaşımda kişilər arasında Azərbaycan çempionu olmağım idi. Bu, 1998-ci ildə baş verdi. Həmin vaxt yarışlar indiki İdman Sarayında, ozamankı Əl Oyunları Sarayında keçirilirdi. Ən yaddaqalan oyunlarımdan biri isə 2005-ci ildə Səudiyyə Ərəbistanında keçirilən ilk İslam Oyunlarının yarımfinalında İran millisinə qarşı keçirdiyimiz qarşılaşmadır. Oyunun son saniyələrində hesab 68:68 idi. Cərimə atışından bir xal qazandım. Daha sonra atdığım top səbətə daxil olmadı, lakin top yenidən mənə qayıtdı. İkinci cəhddə iki xal qazandım və komandanı önə keçirdim. Nəticədə həmin oyunda qalib gələrək finala yüksəldik. Finalda Əlcəzair yığması ilə qarşılaşdıq və qalib gələrək 2005-ci ildə keçirilən ilk İslam Oyunlarının çempionu olduq. Bu səbəbdən həmin turnir və xüsusilə İranla yarımfinal görüşü karyeramın ən yaddaqalan anlarındandır.
– Karyeranız ərzində peşman olduğunuz, “kaş ki, bu təklifi qəbul edərdim” dediyiniz məqam olub?
– 2001-ci ildə Kiprdə keçirilən turnirdə iştirak edirdim. Həmin vaxt 17-18 yaşım var idi. Menecer mənə Türkiyəyə getməyi təklif etmişdi. “Efes” klubunun aşağı yaş qruplarında məşqlərə başlayıb, daha sonra əsas komandaya keçməyimi istəyirdilər. Lakin həmin vaxt ailəm çox gənc olduğumu düşündüyü üçün getməyimə icazə vermədi. Buna görə həmin təklifi qəbul edə bilmədim. Daha sonra Gürcüstanda oynadım. Orada 8 mövsüm keçirdim və ölkəyə, komandaya kifayət qədər öyrəşmişdim. Sonradan Kanadadan da təklif aldım. Lakin Gürcüstanda hər şey yaxşı olduğu üçün bu təklifi də qəbul etmədim. Daha yüksək maaş üçün komanda dəyişmək istəmirdim. Orada özümü rahat hiss edirdim və buna görə uzun müddət Gürcüstanda oynadım.
– Bu yaşa qədər basketbolda qalmağınızın əsas səbəbi nə olub?
– Əgər məşqçi-oyunçu kimi yox, yalnız basketbolçu kimi fəaliyyət göstərsəydim, bəlkə də 45 yaşıma qədər oynayardım. İndi də oynaya bilərəm. Sadəcə, artıq düşünürəm ki, kifayətdir. Keçən il də Azərbaycan basketbolçuları arasında MVP seçilmişdim. Ən çox xal toplayan və ən çox məhsuldar ötürmə edən oyunçulardan biri olmuşdum. Yəni fiziki baxımdan indi də oynaya bilərəm. Amma artıq məşqçiliyə başlamağın vaxtıdır. Bu il də oynasam, məşqçilik karyeramın başlaması bir qədər gecikəcək. Ona görə basketbolçu karyeramı başa vurub məşqçiliyə yönəlmək istəyirəm. Ümid edirəm ki, məşqçi kimi də uğurlara imza ataram.
– Məşqçi kimi əsas hədəfləriniz nələrdir? Azərbaycandan kənarda çalışmağı düşünürsünüzmü? Bu istiqamətdə təklifləriniz varmı?
– Hələ məşqçi kimi fəaliyyətə yeni başlayacağam. Düzdür, oyunçu-məşqçi kimi çalışmışam, amma bu, tam olaraq məşqçilik sayılmır. İndi sırf məşqçi kimi fəaliyyət göstərəndən sonra əsas məqsədim xaricdə çalışmaqdır. Mən legioner həyatı yaşamışam və məşqçi kimi də xaricdə işləmək istəyirəm. İnanıram ki, buna da nail olacağam. İlk növbədə məşqçilikdə ilk addımımı atmalıyam. Ondan sonra qarşıma yeni hədəflər qoyacağam.
Müxbir – Aynur Əlixanlı
Bölmənin digər xəbərləri
