Londonda Formula 1 azarkeşləri Azərbaycan Qran-Prisi barədə nə düşünürlər? VİDEO
London, 22 sentyabr, AZƏRTAC
Formula 1 Azərbaycan Qran-Prisinə sayılı günlər qalır. Sentyabrın 24-dən 26-dək dünyanın ən sürətli pilotları yenidən Bakı küçələrində mübarizə aparacaqlar. AZƏRTAC Londonda Formula 1 azarkeşləri ilə həmsöhbət olaraq onların Bakı Qran-Prisi, Azərbaycan və builki yarışdan gözləntiləri ilə maraqlanıb.
Londonda yaşayan Kurt Kent Bakı trasını xüsusilə ötmə imkanlarına görə bəyəndiyini bildirib.
“Mənim adım Kurtdur, Londonda yaşayıram və Bakı Qran-Prisini səbirsizliklə gözləyirəm. Tras çox xoşuma gəlir. Düşünürəm ki, ötmələr üçün çox yaxşı trasdır və ümumiyyətlə, Azərbaycan Qran-Prisini həmişə bəyənmişəm”, - deyə o bildirib.
“Ferrari” pilotu Lyuis Hemiltonu dəstəklədiyini deyən azarkeş, buna baxmayaraq, yarışın qalibinin “McLaren”dən ola biləcəyini düşünür: “Hemiltona görə “Ferrari”nin qalib gəlməsini istəyirəm, amma bunun baş verəcəyini düşünmürəm. Məncə, bəlkə də “McLaren” qalib gələr”.
Əslən Avstriyanın Vyana şəhərindən olan və hazırda Londonda yaşayan Filipp Huppmann isə 20 ildən artıqdır Formula 1-i izlədiyini deyir. Mixael Şumaxerin yarışlarını izləyərək böyüdüyünü bildirən Filipp sonradan “Ferrari” azarkeşinə çevrildiyini və indi demək olar ki, bütün yarışları izlədiyini söyləyib.
O, Bakı Qran-Prisi barədə təəssüratlarının yalnız trasla məhdudlaşmadığını qeyd edib. Keçən il Azərbaycan Qran-Prisini canlı izləmək üçün Bakıya səfər edən dostunun həm yarışdan, həm də şəhərdəki atmosferdən çox təsirləndiyini deyib.
“Bakı çox maraqlı şəhərdir – “Küləklər şəhəri”. Tras da əladır: həm çox yüksəksürətli hissələri, həm də texniki baxımdan çətin döngələri var. Mən də ora getməyi çox istərdim”, - deyə Formula 1 azarkeşi bildirib.
Builki yarışın mümkün qalibindən danışan Filipp Maks Ferstappeni dəstəklədiyini, lakin “Ferrari”, “McLaren” və “Mercedes” komandalarının da qələbə şansının olduğunu düşündüyünü bildirib.
“İlk ağla gələn, əlbəttə, Kiminin Qran-Prini qazanacağını deməkdir. Amma mən optimistəm və Maksı dəstəkləyirəm, ona görə də Maksın qalib gəlməsini istəyirəm. Düzünü desəm, böyük ehtimalla qalib “Ferrari”, “McLaren” və ya “Mercedes”dən biri olacaq”, - deyə o əlavə edib.
Filipp Azərbaycanı gələcəkdə ziyarət etmək istədiyini də vurğulayıb: “Azərbaycan çox maraqlı ölkədir. Bakının zəngin tarixi və möhtəşəm İçərişəhəri var. Səyahət etmək üçün çox gözəl ölkədir. Ümid edirəm ki, Azərbaycanın gələcəyi də uğurlu və firavan olacaq”.
Bütün həyatını Londonda keçirdiyini deyən Miteş Patel isə beş ildir Formula 1-i yaxından izləyir. O da Azərbaycan Qran-Prisini maraqla gözlədiyini və Bakı trasını pilotlar üçün kifayət qədər çətin hesab etdiyini deyib.
“Düşünürəm ki, tras kifayət qədər çətindir. Məncə, Lyuis Hemilton qalib gəlməlidir, amma görək nə baş verir”, - deyə o bildirib.
Miteş Azərbaycanı ziyarət etmək arzusunda olduğunu da qeyd edib: “Azərbaycanı çox bəyənirəm. Ora getməyi çox istərdim”.
Onun fikrincə, Bakı trasının çoxsaylı döngələri və mürəkkəb hissələri azarkeşlərə yenə də həyəcanlı yarış vəd edir.
“Bakı trası çox çətindir, çoxlu döngələri və mürəkkəb hissələri var. Düşünürəm ki, izləmək üçün çox maraqlı və həyəcanlı Qran-Pri olacaq”, - deyə Miteş Patel bildirib.
Bölmənin digər xəbərləri
