60 yaşlı Füzuli sakininin doğma yurd sevinci: “Sanki yenidən doğulmuşam” FOTO
Füzuli, 19 yanvar, Aydın Yavərzadə, AZƏRTAC
İşğaldan azad olunmuş Füzuli şəhərində həyat yenidən canlanıb. Şəhərdə qısa müddət ərzində genişmiqyaslı quruculuq işləri aparılıb, yeni yaşayış binaları, sosial obyektlər, məktəblər və infrastruktur yaradılıb. Uzun illər məcburi köçkün həyatı yaşamış sakinlər də mərhələli şəkildə doğma yurdlarına qayıdır, şəhərdə gündəlik həyat öz axarına düşüb. Füzuli indi illərin həsrətinin başa çatdığı, gerçəkləşən arzuların və yeni başlanğıcların ünvanına çevrilib.
AZƏRTAC-ın bölgə müxbiri Füzuli şəhərində məskunlaşan ailələrdən biri ilə görüşüb, onların təəssüratlarını qeydə alıb.
Ailə başçısı Əfsələddin Əliyevlə söhbət edirik. 1964-cü ildə Füzuli şəhərində dünyaya göz açan həmsöhbətimiz bildirir ki, valideynləri müəllim olublar: “Atam həm də Qarabağın zəngin musiqi sənətinə könül vermiş tanınmış tarzən idi. Mən Füzuli şəhərinin Xanlar küçəsində böyümüşəm, burada təhsil almışam. 1993-cü ilin avqustunda Füzuli işğal olunanda polis əməkdaşı idim və Birinci Qarabağ müharibəsinin iştirakçısı kimi döyüşürdüm. Doğma yurdumuzdan didərgin düşəndə cəmi 29 yaşım vardı”.
O, doğma yurduna qovuşmağın sevincini bizimlə paylaşaraq deyir ki, 60 illiyini öz yurdunda qeyd edib. “Sanki yenidən doğulmuşam... Bu möhtəşəm Zəfər Müzəffər Ali Baş Komandan İlham Əliyevin uzaqgörən rəhbərliyi və rəşadətli Azərbaycan Ordusunun qətiyyəti sayəsində gerçəkləşdi. Prezidentimizə və ordumuza sonsuz minnətdaram. Allah şəhidlərimizə rəhmət eləsin, qazilərimizə şəfa versin.
Bu gün Füzulidə həyat yenidən canlanıb - burada müasir şəhər salınıb, hər biri sənət əsəri olan gözəl binalar inşa edilib. Övladlarım da artıq buraya köçüblər. İki oğlum məhz Füzulidə yaşayır və çalışır. Biri bizimlə eyni evdə, digəri isə qonşuluğumuzda məskunlaşıb. Sevincimiz bitmək bilmir – cəmi bir neçə gün əvvəl daha bir nəvəm məhz doğma yurdumuzda dünyaya göz açdı.
Uzun illər məcburi köçkünlük həyatı yaşayanda bəzən xəyallara dalır, “kaş bir quş olub uçsam, uşaqlıq illərimin keçdiyi o küçələrə bircə anlıq baxa bilsəm” deyə düşünürdüm. Amma biz ümidimizi heç vaxt itirmədik. Bu gün ən böyük arzum gerçəkləşib. İnanın, bundan böyük xoşbəxtlik ola bilməz. Burada nəfəs aldıqca özümü hər gün daha gümrah və cavan hiss edirəm”.
Evin ağbirçəyi Ülkər Hacıyeva bildirir ki, Füzulinin işğalı zamanı yaddaşına silinməz izlər həkk olunsa da, artıq həmin acı xatirələr tarixə qovuşub. Onun üçün yenidən dirçələn Füzulidə məskunlaşmaq yeni bir həyatın başlanğıcıdır: “Füzuli işğal olunanda çox ağır günlər yaşadıq. O acı xatirələr hələ də yaddaşımdan silinmir. Doğma yurdumuzdan məcburi köçkün düşəndə 40 yaşım var idi. Övladlarımla, ailəmlə birlikdə hara gedəcəyimizi, taleyimizin necə olacağını bilmirdik. Uzun illər yalnız bir arzu ilə yaşadıq: doğma torpağımıza qayıtmaq. Hər bayramda bir-birimizə “İnşallah, növbəti bayramı Füzulidə keçirək” deyirdik. Bu gün həmin arzularımız çin olub. Artıq doğma Füzulidəyik, bayramları öz yurdumuzda qarşılayırıq. Burada yenidən toylu-büsatlı, firavan günlər başlayıb. Bu xoşbəxtliyi bizə bəxş edən dövlətimizə, Prezident İlham Əliyevə və rəşadətli Ordumuza minnətdarıq. Şəhidlərimizin ruhu şad olsun, qazilərimizə Allahdan şəfa diləyirik”.
Bir vaxtlar Füzulidə müəllim işləmiş evin xanımı Firuzə Hacıyeva isə qeyd edir ki, şəhəri tərk edəndə cəmi 23 yaşı olub.
“Həmin vaxt həyat yoldaşım polis əməkdaşı idi və cəbhədə döyüşürdü. Mən isə iki körpə övladım və valideynlərimlə birlikdə Füzulidən çıxmağa məcbur qaldım. İşğaldan əvvəl müəllim işləyirdim. Köçkünlük illərində Bakıda məskunlaşdıq və pedaqoji fəaliyyətimi orada davam etdirdim. Amma qəlbimdə bir arzu yaşadırdım: doğma Füzuliyə qayıdıb yenidən buranın məktəblərində dərs deyim. Şükürlər olsun ki, bu istəyim gerçəkləşdi. Artıq iki ildir ki, Füzuli şəhərində yaşayıram və Mirzə Uluqbəy adına 1 nömrəli tam orta məktəbdə müəllim işləyirəm”, - deyə Firuzə xanım bildirir.
O söhbəti davam etdirərək deyir ki, vaxtilə Füzulidə Bünyad Sərdarov adına məktəbin şagirdi idi, bu gün isə doğma şəhərində şagirdlərə dərs deyir: “Məktəbimiz müasir standartlara uyğun inşa olunub, burada yüksək səviyyədə tədris şəraiti yaradılıb. Evimin pəncərəsindən hər gün işlədiyim məktəbi görmək mənim üçün sözlə ifadə edilə bilməyən hüzur və qürur qaynağıdır. Bizə bu qüruru yaşadan Ali Baş Komandan İlham Əliyevə təşəkkür edirəm. Allah şəhidlərimizə rəhmət eləsin, qazilərimizə şəfa versin”.
Bu ailənin timsalında Füzulinin hər bir küçəsində bənzər sevinc və qürur hissləri yaşanmaqdadır. İllərdir sükuta qərq olmuş bu torpaqlar artıq uşaq gülüşləri, məktəb zəngləri və yeni qurulan ocaqların istisi ilə nəfəs alır. Füzulidə bərpa olunan hər bir ev və hər bir tale “Böyük Qayıdış”ın, sadəcə, bir dövlət proqramı deyil, həm də xalqımızın milli ruhunun zəfəri olduğunun ən bariz sübutudur.
Bölmənin digər xəbərləri
