Qəbələdə keçirilən mürəbbə festivalında 6 ölkədən, 30 şəhər və rayondan gətirilən mürəbbələr nümayiş olunub VİDEO
Qəbələ, 29 avqust, Şahnəzər Bəşirov, AZƏRTAC
Avqustun 29-da Qəbələ şəhərində III Beynəlxalq Mürəbbə Festivalı keçirilib. Qəbələ rayon İcra Hakimiyyətinin təşəbbüsü və təşkilatçılığı, Mədəniyyət və Turizm Nazirliyinin Milli Kulinariya Mərkəzinin, Azərbaycan Milli Kulinariya Assosiasiyasının dəstəyi ilə keçirilən festivalın iştirakçıları əvvəlcə ulu öndər Heydər Əliyevin xatirəsini ehtiramla yad edərək, abidəsi önünə gül dəstələri düzüblər. Sonra isə Heydər Əliyev parkından festival keçirilən əraziyədək mürəbbə ustalarının və ictimaiyyət nümayəndələrinin iştirakı ilə yürüş olub.
AZƏRTAC xəbər verir ki, Qəbələ şəhərindəki “Qafqaz Karvansaray” otelinin qarşısındakı parkda keçirilən beynəlxalq festivalda Azərbaycan, Türkiyə, Rusiya, İran, Serbiya, Qırğızıstan şirniyyatçıları, eləcə də ölkəmizin 30 şəhər və rayonunu təmsil edən mürəbbə ustaları öz məhsullarını nümayiş etdiriblər.
Dünya Kulinariya Təşkilatları Birliyinin və Dünya Xalq Yaradıcılığı Təşkilatının himayəsi altında keçirilən festivalı izləyənlər arasında Mədəniyyət və Turizm Nazirliyinin, Qəbələ Rayon İcra Hakimiyyətinin, Azərbaycan Milli Kulinariya Mərkəzinin rəhbər şəxsləri, bir neçə ölkənin Azərbaycandakı səfirləri, üç mindən çox yerli və xarici turist olub. Festivalın açılış mərasimində Qəbələ rayon İcra Hakimiyyətinin başçısı Səbuhi Abdullayev, UNESCO-nun Dünya Xalq Yaradıcılığı Təşkilatının prezidenti Karmen de Padella, Milli Məclisin deputatı, Respublika Ağsaqqallar Şurasının sədri Fəttah Heydərov, Azərbaycan Milli Kulinariya Mərkəzinin direktoru Tahir Əmiraslanov, Mədəniyyət və Turizm Nazirliyinin şöbə müdiri Fikrət Babayev çıxış ediblər.
Bildirilib ki, artıq üç ildir Qəbələ möhtəşəm mürəbbə festivalına ev sahibliyi edir. 2013-cü ildə bu festivalda 11, ötən il 20, bu il isə 30 şəhər və rayondan, eləcə də 6 ölkədən şirniyyatçıların iştirak etməsi bu tədbirə marağın ildən-ilə artmasından xəbər verir. Belə festivalların keçirilməsində əsas məqsəd xalqımızın qeyri-maddi mədəni irsinin qorunub saxlanmasına nail olmaqdır. Vurğulanıb ki, bu festival təkcə Qəbələnin deyil, ölkəmizin bütün bölgələrinin zəngin mətbəx mədəniyyətinin daha yaxından tanıdılmasında əhəmiyyətli rol oynayır. Beynəlxalq festivalın Azərbaycanın qədim və gözəl şəhərlərindən biri olan Qəbələdə keçirilməsi təsadüfi deyil. Böyük inkişaf yolu keçən Qəbələ xalqımızın mətbəx mədəniyyətinin formalaşmasında da mühüm rol oynayır.
Qeyd olunub ki, Azərbaycan dünyanın ənənəvi mürəbbə sənətinin mərkəzləri arasında xüsusi yer tutur. Ölkəmizin şirniyyatçıları tərəfindən hazırlanan mürəbbələr özünün ləziz dadı və geniş çeşidi ilə fərqlənir. Bunu Qəbələ Beynəlxalq Mürəbbə Festivalında Azərbaycan və xarici ölkələrin təqdim etdiyi mürəbbələri müqayisə etdikdə aydın görmək mümkün olub.
Festivalda rayon və şəhərlərin hər birindən 8 çeşiddə mürəbbə hazırlayan 8 nəfərdən ibarət komanda, eləcə də bədii kollektivlər, xalq tətbiqi sənəti ustaları iştirak ediblər. Festival əvvəlcə yarış şəklində təşkil olunub. Bunun üçün xüsusi komissiya yaradılıb. İştirakçılar müsabiqəyə gilas, böyürtkən, çiyələk, heyva, qoz, ərik, gül və gavalı mürəbbələri təqdim ediblər. Komissiya tərəfindən isə 19 nəfərdən ibarət münsiflər heyəti seçilib. Münsiflər heyətinin tərkibinə müvafiq sahə üzrə ixtisaslaşmış mütəxəssislər və digər ekspertlər daxil edilib.
Yarışlar bitdikdən sonra mürəbbələrin satışı üçün şərait yaradılıb və sərgi təşkil olunub. Festivalda komandalar tərəfindən təqdim olunan müxtəlif çeşiddə mürəbbələr, şirniyyat və meyvə şirələri yerli və xarici turistlərin böyük marağına səbəb olub. Onlar mürəbbələrin dadına baxıb və hazırlanması üsulu ilə maraqlanıblar.
Festival çərçivəsində xalq tətbiqi sənəti ustalarının əsərlərindən ibarət sərgi-yarmarkalar, həmçinin bədii kollektivlərin çıxışları təşkil edilib.
Münsiflərin rəyi əsasında iştirakçıların gözü qarşısında ən yaxşı mürəbbə hazırlayan şəxslər müəyyənləşdirilib. Müsabiqədə üç nominasiya üzrə qaliblər elan edilib. Onlara kubok, medal və qiymətli hədiyyələr təqdim olunub. Festival maraqlı konsert proqramı ilə davam etdirilib.
Bölmənin digər xəbərləri
