Çində yaşayan azərbaycanlılar beynəlxalq mədəniyyət festivalında ölkəmizi təmsil ediblər VİDEO
Pekin, 13 may, AZƏRTAC
Çində yaşayan azərbaycanlılar Pekindəki Fançaodi beynəlxalq məktəbinin yaranmasının 60-cı ildönümü münasibətilə keçirilən beynəlxalq mədəniyyət festivalında ölkəmizi təmsil ediblər.
Xalqlar arasında mədəniyyət mübadiləsini təşviq etmək məqsədi daşıyan festivalın açılışında çıxış edənlər bu cür tədbirlərin fərqli mədəniyyətlərin qarşılıqlı anlaşmasını yaxşılaşdırmağa xidmət etdiyini bildiriblər.
Pekində yaşayan həmvətənlərimizin Azərbaycanın bu ölkədəki səfirliyinin dəstəyi ilə hazırladıqları milli pavilyonda Azərbaycanın tarixinə, mədəniyyətinə, ulu öndər Heydər Əliyevin həyatına, Prezident İlham Əliyevin liderliyi ilə Azərbaycanın hazırkı inkişafına, dövlət başçısının Çinə səfərlərinə və ölkəmizin turizm imkanlarına dair kitablar, nəşrlər, bukletlər, o cümlədən “İrs”, “Bakı” və “Visions of Azerbaijan” jurnallarının müxtəlif dillərdəki nüsxələri, milli geyimlər, suvenirlər nümayiş olunurdu. Milli pavilyonda AZƏRTAC-ın arxivindən götürülmüş və ulu öndər Heydər Əliyevin, Prezident İlham Əliyevin müxtəlif vaxtlarda Çinə səfərlərinə, ikitərəfli münasibətlərin siyasi, iqtisadi, mədəni və digər sahələrinə dair fotoşəkillərdən ibarət stend də nümayiş olunub.
Azərbaycan pavilyonunu ziyarət edənlərə qədim mədəniyyət mərkəzlərindən biri olan Azərbaycanın dünya sivilizasiyasına verdiyi töhfələr, ölkəmizin tolerantlıq və multikulturalizm dəyərləri, respublikanın son illər müxtəlif sahələrdə əldə etdiyi uğurlar, habelə Azərbaycanda keçirilmiş və təşkili nəzərdə tutulan nüfuzlu beynəlxalq tədbirlər, Ermənistanın hərbi təcavüzü nəticəsində işğal altındakı ərazilərdə mədəni və tarixi abidələrə qarşı törədilən vəhşiliklər barədə ətraflı məlumat verilib.
Bundan başqa, qonaqlara milli mətbəximizin təamları - plov, dolma, kabab, qutab, şirniyyatlardan paxlava, şəkərbura, kətə təklif olunub.
Festivalın təşkilat komitəsinin qərarı ilə Azərbaycan pavilyonu tədbirdə təmsil olunan ölkələrin milli pavilyonları arasında ən yaxşısı seçilib. Bununla əlaqədar, təşkilat komitəsi adından Azərbaycanın Pekindəki səfirliyinə təşəkkür məktubu da daxil olub.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
