MƏDƏNİYYƏT
Bakıda “Azaflı gecəsi” keçirilmişdir
Bakı, 7 yanvar (AZƏRTAC). “Avrasiya Beynəlxalq Araşdırmalar İnstitutu” İctimai Birliyinin təşkilatçılığı ilə Rəşid Behbudov adına Azərbaycan Dövlət Mahnı Teatrında “Azaflı gecəsi” keçirilmişdir.
Gecənin aparıcısı, filologiya elmləri doktoru, professor Qəzənfər Paşayev respublikamızda aşıq sənətinə, mədəniyyətə göstərilən yüksək dövlət qayğısından danışaraq bildirmişdir ki, bu qayğıdan ruhlanan ictimai birliklər yaddaqalan proqramlar tərtib etmişlər. “Azaflı gecəsi” də həmin proqramlardan biridir.
Tədbirdə çıxış edən Milli Məclisin deputatı Qənirə Paşayeva bu proqramın türk dünyasının böyük ozanı Mikayıl Azaflının yaradıcılığı əsasında tərtib olunmasının və məhz “Azaflı gecəsi” adı ilə Cənubi Azərbaycan aşıqlarının ifası və iştirakı ilə keçirilməsinin xüsusi əhəmiyyət daşıdığını bildirmişdir.
Gecədə Cənubi Azərbaycandan tanınmış aşıq Çingiz Biriyanın başçılıq etdiyi aşıqlar ansamblı – aşıqlar Cavad Məhərrəmi, Bəhmən Qurbanzadə, Cəfər Xakipur, Əsgər Məhərrəmi, Səyyad Kazımi, Məhəmməd Xrədmənd, balabançılar – Yusif Məhərrəmi, Əkbər Sərvazi, Əlirza İmampur maraqlı konsert proqramı ilə çıxış etmişlər.
Tədbirdə, həmçinin Azaflı ocağının övladları – Gülarə Azaflı, Aşıq Hakim, Minayə Azaflı, ustadın nəvələri – Roman Hakimoğlu və Məhsəti Azaflı da çıxış etmişlər.
Gecənin sonunda Qənirə Paşayeva “Avrasiya Beynəlxalq Araşdırmalar İnstitutu” İctimai Birliyinin adından Azərbaycan Aşıqlar Birliyinin Cənubi Azərbaycan üzrə koordinatoru Böyükbəy Ələkbəroğluna və tədbirin ideya müəllifi və aparıcısı Qəzənfər Paşayevə “Aşıq sənətinin inkişafındakı xidmətlərinə görə” xatirə plaketlərini təqdim etmişdir.
Tamaşaçıların böyük maraqla izlədikləri tədbir 4 saata yaxın davam etmişdir.