Bakıda mas-reslinq üzrə Avropa çempionatının açılış mərasimi keçirilib
Bakı, 18 avqust, Göyçək Mahmudlu, AZƏRTAC
Avqustun 18-də Bakıda kişi və qadınlar arasında mas-reslinq üzrə Avropa çempionatına start verilib.
AZƏRTAC xəbər verir ki, yarışda Azərbaycan, Türkiyə, Gürcüstan, Ukrayna, Macarıstan, Slovakiya, Finlandiya, Rusiya və Fransadan 100-ə yaxın idmançı iştirak edir. Azərbaycan bu idman növü üzrə qitə miqyaslı turnirdə 36 atletlə təmsil olunur.
Çempionatın açılış mərasimində Gənclər və İdman Nazirliyinin idman şöbəsinin müdiri Fərid Mansurov, Azərbaycan Mas-reslinq Federasiyasının prezidenti Ramiz Əliyev, Bakı Şəhər Gənclər və İdman Baş İdarəsinin rəisi Raqif Abbasov, Milli İdman Növləri Assosiasiyasının prezidenti Xanlar Qurbanov çıxış edərək, Azərbaycanın dünyada idman ölkəsi kimi tanındığını və respublikamızın mötəbər beynəlxalq yarışlara uğurla ev sahibliyi etdiyini bildiriblər. Çıxışlarda belə yarışların ölkəmizdə keçirilməsinin Azərbaycanın idmanda qazandığı uğurlarının göstəricisi olduğu qeyd edilib. Diqqətə çatdırılıb ki, Azərbaycan Prezidenti İlham Əliyevin və Birinci vitse-prezident Mehriban Əliyevanın rəhbərliyi və dəstəyi ilə Azərbaycan son illərdə bir neçə mühüm beynəlxalq idman yarışına yüksək səviyyədə ev sahibliyi edib. Bu uğurlar nəticəsində ölkəmiz dünyanın idman mərkəzlərindən biri olduğunu sübuta yetirib.
Beynəlxalq Mas-reslinq Federasiyasının vitse-prezidenti Aleksandr Kim-Kimen Bakıda olmaqdan məmnunluğunu ifadə edib, yarışların yüksək səviyyədə təşkilatçılığına görə minnətdarlığını bildirib. Mas-reslinq idmanının tarixi haqqında məlumat verən qonaq deyib ki, Saxa-Yakutiyanın milli idman növü olan mas-reslinq 2012-ci ildən etibarən qeyri-ənənəvi idman növləri siyahısına daxil edilib. Bu idman növü üzrə beynəlxalq federasiya təsis olunub, qitə miqyaslı turnirlər, dünya çempionatları keçirilir. Mas-reslinq sentyabrın 2-dən 9-dək Qırğızıstanda keçiriləcək türkdilli xalqların dünya oyunlarının proqramına da salınıb.
Daha sonra Aleksandr Kim-Kimen Avropa çempionatını açıq elan edib.
Azərbaycan Respublikasının dövlət himni səsləndirildikdən sonra kişilər arasında 60, 80 və 125, qadınların mübarizəsində isə 55, 75 kiloqram və 85 kiloqramdan yuxarı çəki dərəcələrində final yarışlarına start verilib.
Mas-reslinq üzrə qitə turnirinin ilk günündə təmsilçilərimiz 8 medal qazanıblar. Medallardan biri gümüş, qalanları isə bürüncdür. İdmançılarımızdan ən yaxşı nəticəni kişilər arasında 60 kiloqram çəki dərəcəsində Mahir Ağayev göstərib. Təmsilçimiz yalnız finalda rusiyalı Aisien Migalkinə məğlub olaraq gümüş medalla kifayətlənib. Həmin çəki dərəcəsində mübarizə aparan Rəsul Səfərov və Fərid Cəfərov isə bürünc medal qazanıblar. Vüsal Orucov (125 kq) da Avropa çempionatını üçüncü yerdə başa vurub.
Zərif cinsin nümayəndələrinin mübarizəsində isə Şəbnəm Əhmədova (55 kq), Nərgiz İbrahimova, Lalə Gülbalayeva (hər ikisi 75 kq) və Fidan Əbdülrəhimova (85 kq-dan yuxarı) fəxri kürsünün üçüncü pilləsində yer alıblar.
Avqustun 19-da keçiriləcək sonuncu yarış günündə kişilər arasında 70, 90, 105 kiloqram və 125 kiloqramdan yuxarı, qadınların mübarizəsində isə 65 və 85 kiloqram çəki dərəcələrində qaliblərin adlarına aydınlıq gələcək.
Qeyd edək ki, Azərbaycanda mas-reslinq üzrə beynəlxalq səviyyəli turnir ilk dəfədir keçirilir.
Bölmənin digər xəbərləri
