"PAŞA Bank" 2025-ci il üzrə ilk dividend ödənişinə başlayır
Bakı, 4 iyul, AZƏRTAC
"PAŞA Bank" ASC bu il iyunun 18-də keçirilmiş Səhmdarların Ümumi Yığıncağının qərarından irəli gələrək, 2025-ci il maliyyə nəticələri üzrə 107 milyon manat dividend məbləğinin ödənişini nəzərdən keçirib.
Bankdan AZƏRTAC-a bildirilib ki, dividend ödənişi iki mərhələdə həyata keçiriləcək və ilk mərhələ çərçivəsində səhmdarlara 53,5 milyon manat ödəniləcək. Dividend məbləği Azərbaycan Respublikasının Milli Depozit Mərkəzi (MDM) tərəfindən hər bir səhmdarın müvafiq bank hesabına köçürüləcək.
İlk dividend ödənişi ilə bağlı əsas məlumatlar:
• Dividend məbləği: 53,521,500.00 manat
• Hüquq tarixi: 8 iyul 2026, saat 18:00 tarixinə MDM-in apardığı səhmdarların reyestrində qeyd edilən şəxslər
• Ödəniş tarixi: 10 iyul 2026
Səhmləri hansı tarixdə əldə etməsindən və hansı müddət ərzində öz mülkiyyətində saxlamasından asılı olmayaraq, dividend almaq hüququna malik səhmdarlar MDM-in apardığı 2026-cı il 8 iyul, saat 18:00 tarixinə olan səhmdarların müvafiq reyestrinə əsasən müəyyənləşdiriləcəklər. Qeyd edək ki, "PAŞA Bank" ASC səhmlərinin kütləvi ticarətinin “Bakı Fond Birjası” QSC-də həyata keçirildiyini və bağlanmış əqdlər üzrə hesablaşmaların əqdin bağlandığı gündən etibarən növbəti iş günü başa çatdığını nəzərə alaraq, 8 iyul 2026-cı il, saat 18:00 tarixinə olan səhmdarların müvafiq reyestrində həmin tarixdən 1 iş günü əvvəl (7 iyul 2026-cı il, 16:30-dək) baş tutan səhm alışları nəzərə alınacaq.
"PAŞA Bank" ASC təsdiq edir ki, səhmlərinin ilkin kütləvi təklifi (IPO) zamanı Bankın səhmlərini əldə etmiş bütün fiziki və hüquqi şəxslər digər səhmdarlarla bərabər əsaslarla 2025-ci il üzrə dividend almaq hüququna malikdirlər. Dividendlərin ikinci hissəsinin ödənişi 2026-cı ilin oktyabr ayı ərzində nəzərdə tutulur. Eyni zamanda, Azərbaycan Respublikasının Vergi Məcəlləsinin 102.1.22-2-ci maddəsini nəzərə alaraq, tənzimlənən bazarda kütləvi təklif edilmiş səhmlər üzrə dividend gəlirləri 2028-ci il 1 fevral tarixinədək fiziki şəxslərin gəlir vergisindən azaddır. Bu səbəbdən dividend ödənişləri zamanı 5 faiz ödəmə mənbəyində vergi tutulmayacaq və fiziki şəxs investorlara vəsait tam həcmdə köçürüləcək.
Xatırladaq ki, "PAŞA Bank" ASC-nin səhmlərinin ilkin kütləvi təklifi (IPO) bu il iyunun 19-da uğurla başa çatıb. Bu, Azərbaycan kapital bazarı tarixində ilk özəl şirkət IPO-su olmaqla yanaşı, həm fərdi, həm də korporativ investorlar tərəfindən böyük maraqla qarşılanıb. Təxminən 18 min unikal investorun iştirakı, 129,2 faiz örtülmə nisbəti və 66,3 milyon manat həcmində sifarişlə nəticələnən IPO investor bazasının genişlənməsinə, qiymətli kağızlar bazarına marağın artmasına və ölkədə kapital bazarının inkişafına təkan verib.
Bölmənin digər xəbərləri
