Bakı, 18 noyabr, AZƏRTAC

Qida Təhlükəsizliyi Agentliyinin təşəbbüsü ilə qida sahəsində fəaliyyət göstərən sahibkarlıq subyektlərinə dəstək tədbirləri çərçivəsində “Qida Biznes Klubu” adlı daha bir layihənin icrasına başlanılıb.

Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, qida sənayesi sahəsində fəaliyyət göstərən sahibkarlar, agentlik və tabeliyində fəaliyyət göstərən Qida Təhlükəsizliyi İnstitutunun mütəxəssisləri, eləcə də Azərbaycan Sahibkarlar (İşəgötürənlər) Təşkilatları Milli Konfederasiyasının nümayəndələrinin iştirakı ilə layihənin təqdimatı keçirilib.

Tədbirdə “Qida Biznes Klubu” haqqında görüş iştirakçılarına ətraflı məlumat verilərək bildirilib ki, “Qida Biznes Klubu” qida sahəsində ölkədə olan mövcud vəziyyəti və inkişaf perspektivlərini dəyərləndirərək bu sahədə qida təhlükəsizliyi üzrə yerli və beynəlxalq qanunvericiliyi, təcrübəni və əlaqədar texniki dəstək xidmətlərini və Qida Təhlükəsizliyi İnstitutunun xidmətlərini özündə birləşdirir. Klub üzvlərinə texniki dəstək xidmətini İcra Komitəsi həyata keçirəcək. Həmçinin layihə çərçivəsində agentlik sədrinə yeni təyin olunmuş beynəlxalq müşavirlərin - Ringolds Arnitis (Latviya), Ana Allende (İspaniya), Güven Güneren, Nevzat Birişik, Veli Cengiz Özalpın (Türkiyə) sahibkarlarla müvafiq qida təhlükəsizliyi sisteminin prinsipləri, burada sahibkarların üzərinə düşən məsuliyyət və prosesdə iştirakları, bu sahədə yeni metodologiyaların tələbləri və öz ölkələrində əldə olunmuş müsbət təcrübələrin bölüşülməsi sahəsində fikir mübadiləsi aparılacaq. Eyni zamanda qida zənciri üzrə sahibkarlıq subyektinin fəaliyyət istiqamətindən asılı olaraq klubun ictimai iaşə komitəsi, qida istehsalı komitəsi, logistika və distribüterlik komitəsi, kiçik sahibkarlıq komitəsi və digər komitələrin də yaradılması nəzərdə tutulub.

Görüş iştirakçılarının nəzərinə çatdırılıb ki, layihə çərçivəsində Qida Təhlükəsizliyi Agentliyi və Qida Təhlükəsizliyi İnstitutunun fəaliyyət istiqamətləri və təklif etdiyi xidmətləri çərçivəsində klub üzvlərinə bizneslərini daim inkişaf etdirmək üçün lazımi dəstək veriləcək. Sahibkarların yarana biləcək problemlərinin daha çevik və operativ qaydada aradan qaldırılması istiqamətində zəruri tədbirlər həyata keçiriləcək və bununla da müasir tələblərə uyğun məhsul və xidmətlərin realizasiyasının həyata keçirilməsi təmin olunacaq.

Qeyd olunub ki, “Qida Biznes Klubu”na üzvlük subyektlərin fəaliyyət istiqamətləri və sahələri nəzərə alınmaqla tənzimlənir. Belə ki, “Qida Biznes Klubu”na qida zəncirinin bütün mərhələlərində iştirak edən, yəni qida məhsullarının “tarladan süfrəyədək” prinsipi əsasında ilkin istehsalı, tədarükü, istehsalı, emalı, qablaşdırılması, saxlanması və daşınması (logistika və distribüterlik), eləcə də ictimai-iaşə müəssisələri kimi fəaliyyət istiqaməti ilə məşğul olan sahibkarlıq subyektləri üzv ola bilərlər. Qiymətləndirmə əsasında fəallıq nümayiş etdirmiş üzvün və ya üzvlüyə namizədin il ərzində müvafiq güzəştlərlə daha yüksək kateqoriyaya irəli çəkilməsi həyata keçiriləcək. Bundan başqa, “Qida Biznes Klubu”nun üzvləri bir çox hüquq və imtiyazlara malik olacaqlar. Klub üzvləri güzəştli texniki dəstək və laborator xidmətlərdən faydalana biləcəklər. Təklif olunan xidmətlər vasitəsilə qida sahəsində fəaliyyət göstərən klub üzvləri tərəfindən keyfiyyətli və təhlükəsiz xidmət və məhsulların realizasiyası zamanı fasiləsizlik, əlçatanlıq və dayanıqlılıq təmin ediləcək.