ABƏŞ QADINLAR ÜÇÜN DAVAMLI GƏLİR İMKANLARI YARADIR
bp-Azərbaycan şirkətinin ictimaiyyətlə əlaqələr şöbəsindən AZƏRTAC-ın müxbirinə bildirmişlər ki, bu layihə “Azəri-Çıraq-Günəşli” layihəsinin Səngəçal terminalı ətrafında ictimai inkişaf üçün nəzərdə tutulan iri Sosial Sərmayə Proqramı çərçivəsində həyata keçirilir. Məqsəd, qəsəbədə yaşayan qaçqın və məcburi köçkünlər üçün davamlı iş imkanları yaratmaqdır. BMT-nin İnkişaf Proqramının yeritdiyi siyasətə və qazandığı təcrübəyə uyğun hazırlanan bu layihəni qəsəbədə yaradılmış, həm də qaçqın qadınlardan ibarət “İnsan İnkişafı və Davamlı Gəlir Yaradılmasına Dəstək Birliyi” adlı ictimai təşkilat reallaşdıracaqdır.
Birlik öz fəaliyyətinə beynəlxalq standartlara uyğun iş əlcəklərinin istehsalı ilə başlamışdır. İndiyədək belə əlcəklər ölkəyə xaricdən gətirilirdi. Bu əlcəklər keyfiyyət şəhadətnaməsinə layiq görülmüşdür. Məhsulun istehsalı üçün avadanlıq və tikiş maşınları alınması “Azəri-Çıraq-Günəşli” layihəsi çərçivəsində maliyyələşdirilmişdir. Bu birliyin 10 nəfər təlim keçmiş və şəhadətnamə almış üzvü öz evlərində işləməli olacaqdır. İstehsal edilmiş məhsullar, layihədə nəzərdə tutulduğu kimi, satın alınacaqdır.
İş əlcəklərinin istehsalı layihənin ilkin mərhələsidir. bp-Azərbaycan şirkəti məhsulların çeşidini artırmaqla istehsalı genişləndirmək və qaçqın qadınlara göstərdiyi dəstəyi davam etdirmək niyyətindədir.
Bölmənin digər xəbərləri
