ABŞ AĞBALIQ KÜRÜSÜNÜN İDXALINI DAYANDIRA BİLƏR
Birləşmiş Ştatların Balıq və Təbiət Xidməti ölkə qanunvericiliyinə uyğun olaraq, nəsli kəsilmək təhlükəsi olan təbiət növlərinin siyahısını elan etmişdir. Yaxın altı ay ərzində bu növlərin qorunmasına dair qaydalar tərtib olunmalıdır. Bu müddət ərzində qaydalar elan olunmasa, ABŞ ağbalıq kürüsünün idxalını dayandıra bilər.
Xatırladaq ki, bu günlər yalnız Xəzər və Qara dəniz hövzələrində ovlanan ağbalığın alqı-satqısını 1998-ci ildən bəri Nəsli Kəsilmək Təhlükəsi olan Təbiət Növlərinin Beynəlxalq Ticarət Konvensiyası tənzimləyir. ABŞ hökumətinin indiki qərarı həmin beynəlxalq qaydalarla ayaqlaşmaq məqsədi daşıyır.
Ölkənin Balıq və Təbiət Xidməti bildirir ki, illik qanuni ticarət dövriyyəsi 100 milyon dollardan çox dəyərləndirilən ağbalıq kürüsünün bir kiloqramı bazarda 3200 ABŞ dolları qiymətindədir. Lakin Azərbaycan, Qazaxıstan, Rusiya və Türkmənistandakı brakonyerlik ağbalığın qeyri-qanuni ticarət dövriyyəsini 10 dəfə çoxaldır.
Xəzər dənizində nərə balığı və kürü ixracına dair illik kvotanı BMT-nin Ətraf Mühitin Qorunması Proqramı nəzdindəki Nəsli Kəsilmək Təhlükəsi olan Təbiət Növlərinin Beynəlxalq Ticarət Konvensiyası təşkilatı müəyyənləşdirir. Son məlumata görə, 2004-cü il üçün kürü ixracı kvotası 146760 kiloqramdır.
Bölmənin digər xəbərləri
