ABŞ alimləri: Milli Elmi Şuranın ləğvi Çinlə elmi-texniki rəqabətə zərər verir
Bakı, 12 may, AZƏRTAC
Bazar ertəsi günü 2 mindən çox alim ABŞ Konqresinə göndərdiyi məktubda xəbərdarlıq edib ki, Tramp administrasiyası tərəfindən Milli Elmi Şuranın ləğvi Birləşmiş Ştatların Çin kimi rəqiblərlə elmi-texniki rəqabət aparmaq qabiliyyətinə zərər verir.
AZƏRTAC “Reuters” agentliyinə istinadla xəbər verir ki, ötən ayın sonlarında 20-dən çox üzvü olan ABŞ Milli Elmi Şurasının ləğvi qərarı açıqlanıb.
Müstəqil şura 1950-ci ildə Milli Elm Fondunun idarəçiliyinə rəhbərlik etmək, Prezidentə və Konqresə elm və mühəndislik siyasəti ilə bağlı məsləhət vermək üçün yaradılmışdı. Bu quruma altıillik müddətə təyin olunmuş 20-dən çox üzv daxil idi.
Alimlərin açıq məktubunda Konqresdən ləğv edilmiş üzvlərin bərpasına çağırış edilməsi xahiş olunur.
Məktubda Ağ Ev tərəfindən alimlərin işdən çıxarılması “qəfil addım” kimi təsvir edilib və dərin məyusluq ifadə olunub. “İdarə Heyətinin buraxılması ABŞ-nin fundamental və tətbiqi tədqiqatlarla məşğul olmaq, qlobal miqyasda rəqabət aparmaq qabiliyyətinə qarşı həyəcanverici hücumu gücləndirir. Çinin hazırda “AR-GE”yə ABŞ-dən daha çox sərmayə qoyduğunu nəzərə alsaq, bu qərarın ağır fəsadları olacağı bəllidir”, - deyə əlavə edilib.
Prezident Donald Tramp ikinci müddətində müstəqil qurumlara təzyiq göstərib.
Siyasi ekspertlər onun administrasiyasının rəhbər vəzifələrə loyalları yerləşdirməklə və müstəqil, tənqidi səsləri aradan qaldırmaqla bu qurumları yenidən qurmağa çalışdığını bildirirlər.
Məktubda vurğulanıb: “Tənqidi milli məsləhət orqanının bu şəkildə ləğvi mövcud administrasiya tərəfindən hökumətimizi təkcə elmdə deyil, həm də səhiyyə və texnologiyada müstəqil, qeyri-siyasi, nəzarət və ekspert məsləhətlərindən məhrum edən bir çox hərəkətdən yalnız biridir”.
Ağ Ev rəsmisi isə bildirib ki, İdarə Heyəti yaradılarkən Konqres tərəfindən ona verilən səlahiyyətlərin yenilənməsinə ehtiyac ola bilər. O əlavə edib ki, İdarə Heyətinin ləğvinə baxmayaraq, Milli Elm Fondunun işi fasiləsiz davam edir.
Bölmənin digər xəbərləri
